ایران کے نئے رہبرِ اعلیٰ مجتبیٰ خامنہ ای سے وابستہ ٹیلی گرام چینل اور ایرانی ذرائع ابلاغ نے مجتبی خامنہ ای سے منسوب دو پیغامات شائع کیے ہیں۔
خامنہ ای نے ان پیغامات میں ایران کے سکیورٹی چیف علی لاریجانی اور ان کے ساتھ ہلاک ہونے والے دیگر افراد اور بسیج فورس کے سربراہ غلام رضا سلیمانی کی ہلاکت پر تعزیت کی ہے۔
لاریجانی کی ہلاکت سے متعلق پیغام میں خامنہ ای کا کہنا ہے کہ ’خون کے ہر قطرے کی قیمت ہے، جو شہدا کے مجرم قاتلوں کو جلد ادا کرنی پڑے گی۔‘
ایران کے رہبرِ اعلیٰ کی حیثیت سے یہ مجتبیٰ خامنہ ای کی طرف سے شائع کیے گئے تیسرے اور چوتھے پیغامات ہیں۔
ایران نے قومی سلامتی کے مشیر علی لاریجانی کی شہادت کی تصدیق کردی
مجتبیٰ خامنہ ای کو 8 مارچ کو ان کے والد کے جانشین کے طور پر منتخب کیا گیا تھا۔ تاہم آیت اللہ علی خامنہ ای کے جانشین کے طور پر نامزد کیے جانے کے بعد سے وہ اب تک منظرِ عام پر نہیں آئے ہیں اور نہ ہی ان کی کوئی تصویر یا ویڈیو سامنے آئی ہے۔
دوسری جانب بدھ کے روز تہران میں علی لاریجانی اور ان کے ساتھ ہلاک ہونے والے دیگر افراد اور بسیج فورس کے سربراہ غلام رضا سلیمانی کے جنازے میں ہزاروں افراد نے شرکت کی۔
