نیدرلینڈز میں ایک حیران کن تجربے نے لوگوں کو حیرت میں ڈال دیا جب ایک گولڈ فِش نے خاص طور پر تیار کی گئی گاڑی چلا کر عالمی ریکارڈ قائم کر لیا۔ بظاہر یہ بات ناقابلِ یقین لگتی ہے مگر جدید ٹیکنالوجی کی مدد سے یہ کارنامہ ممکن بنایا گیا۔
نیدرلینڈز کے انجینئر تھامس ڈی وولف نے اپنی پالتو گولڈ فِش "بلب” کے لیے چار پہیوں پر مشتمل ایک منفرد گاڑی تیار کی۔ اس گاڑی میں ڈرائیور کی نشست کی جگہ ایک شفاف واٹر ٹینک نصب کیا گیا ہے جس میں مچھلی تیرتی رہتی ہے۔
گاڑی اس طرح ڈیزائن کی گئی ہے کہ واٹر ٹینک کے اندر مچھلی کی حرکت کو سینسرز اور موشن سینسنگ ٹیکنالوجی کے ذریعے پڑھا جاتا ہے۔ مچھلی جس سمت میں تیرتی ہے، گاڑی اسی سمت میں حرکت کرنے لگتی ہے۔
اس تجربے کے دوران "بلب” نامی گولڈ فِش نے ایک منٹ کے اندر تقریباً 40 فٹ کا فاصلہ طے کیا جس کے بعد یہ کارنامہ گنیز ورلڈ ریکارڈز میں شامل کر لیا گیا۔
چین میں بچی کے ہاتھ میں موبائل فون پھٹ گیا، ویڈیو سوشل میڈیا پر وائرل
انجینئر تھامس ڈی وولف کے مطابق اس منصوبے کا مقصد ایک دلچسپ اور تفریحی تجربہ کرنا تھا تاکہ ان کی سنجیدہ پیشہ ورانہ زندگی میں کچھ مزاح اور تخلیقی پہلو شامل ہو سکے۔
انہوں نے مزید بتایا کہ اگرچہ حقیقت میں مچھلی گاڑی نہیں چلا رہی بلکہ سینسنگ ٹیکنالوجی اس عمل میں مدد دیتی ہے، تاہم یہی ٹیکنالوجی مستقبل میں معذور افراد کے لیے بھی فائدہ مند ثابت ہو سکتی ہے، خاص طور پر ایسے لوگوں کے لیے جن کے لیے آزادانہ طور پر حرکت کرنا مشکل ہوتا ہے۔
