عراق کے دارالحکومت بغداد میں ہفتے کی صبح امریکی سفارتخانے کو مبینہ طور پر ڈرون حملے کا نشانہ بنایا گیا ہے۔ عراقی سکیورٹی حکام کے مطابق یہ واقعہ علی الصبح پیش آیا جس کے بعد سفارتخانے کے احاطے سے دھواں اٹھتے دیکھا گیا۔
بین الاقوامی خبر رساں ادارے اے ایف پی سے گفتگو کرتے ہوئے ایک سینئر عراقی سکیورٹی اہلکار نے نام ظاہر نہ کرنے کی شرط پر بتایا کہ ایک ڈرون نے امریکی سفارتخانے کو نشانہ بنایا۔ ایک دوسرے سکیورٹی ذریعے نے بھی اس حملے کی تصدیق کرتے ہوئے کہا کہ حملہ واقعی ڈرون کے ذریعے کیا گیا۔
ادھر خبر رساں ادارے ایسوسی ایٹڈ پریس (اے پی) کی جانب سے جاری کردہ ویڈیو میں بھی سفارتخانے کے کمپاؤنڈ کے اندر سے دھواں اٹھتا دکھائی دیتا ہے، جس سے حملے کی شدت کا اندازہ لگایا جا رہا ہے۔
تل ابیب میں ایرانی میزائل حملے سے امریکی سفارتخانے کو نقصان، اہلکار محفوظ رہے
اے ایف پی کے مطابق یہ واقعہ ایسے وقت میں پیش آیا ہے جب اسی روز فجر سے کچھ پہلے ایران نواز گروہ کتائب حزب اللہ کے ٹھکانوں کو نشانہ بنانے کی کارروائی کی گئی تھی، جس کے بعد خطے میں کشیدگی میں اضافے کا خدشہ ظاہر کیا جا رہا ہے۔
