راولپنڈی کے تھانہ ویسڑیج کے علاقے میں تین ڈاکوؤں نے موٹر سائیکل سوار شہری کو تشدد کا نشانہ بنا کر اس کی موٹر سائیکل اور ہیلمٹ چھین لیے۔
واقعے کی سی سی ٹی وی فوٹیج میں شلوار قمیض پہنے تین ڈاکوؤں کو سکون سے گلی میں پیدل چلتے دیکھا جا سکتا ہے۔ فوٹیج میں دیکھا جا سکتا ہے کہ ڈاکوؤں کے قریب سے دیگر شہری بھی گزرتے ہیں، لیکن کسی نے مداخلت نہیں کی۔
فوٹیج کے مطابق جیسے ہی ڈاکوؤں کو موقع ملتا ہے، وہ موٹر سائیکل سوار کو گھیر کر روکتے ہیں۔ ایک ڈاکو موٹر سائیکل کو عقب سے پکڑ کر روکتا ہے، دوسرا سامنے آکر پسٹل نکال کر تانتا ہے اور تیسرا درمیان میں کھڑا ہو کر سوار کو زبردستی موٹر سائیکل سے اترنے کا کہتا ہے۔
عیدالفطر سے قبل جہلم میں درزیوں نے سلائی کے نرخ بڑھا دیے، شہری پریشان
موٹر سائیکل سوار ہچکچاہٹ کا شکار ہوتا ہے تو ڈاکو اسے تشدد کا نشانہ بنا کر موٹر سائیکل سے اتارتے اور دھکیلتے ہیں۔ تینوں ڈاکوؤں میں ایک سوار کا ہیلمٹ دوسرے کو پہناتا ہے اور تینوں موٹر سائیکل چھین کر فرار ہو جاتے ہیں۔
متاثرہ شہری عمر فیضان نے پولیس میں درخواست دے دی ہے اور مقدمہ درج کر لیا گیا ہے تاکہ ملزمان کو جلد گرفتار کیا جا سکے۔
