بھارتی فضائیہ کا ایک جنگی طیارہ تربیتی مشن کے دوران شمال مشرقی بھارتی ریاست آسام میں گر کر تباہ ہو گیا، جس میں سوار دونوں پائلٹ ہلاک ہو گئے۔
بھارتی فضائیہ کے مطابق سخوئی Su-30MKI طیارہ جمعرات کی شام مقامی وقت کے مطابق سات بج کر بیالیس منٹ پر آسام کے شہر جورہاٹ سے اڑا تھا، تاہم بعد میں اس کا رابطہ منقطع ہو گیا۔ بعد ازاں تصدیق کی گئی کہ طیارہ کاربی آنگلونگ کے علاقے میں، جورہاٹ سے تقریباً ساٹھ کلومیٹر دور گر کر تباہ ہوا۔
حادثے کے بعد بھارتی فضائیہ نے سوشل میڈیا پر بیان جاری کیا کہ تلاش اور ریسکیو آپریشن فوری طور پر شروع کر دیا گیا ہے اور مزید تفصیلات جمع کی جا رہی ہیں۔ رپورٹ کے مطابق طیارہ مقررہ وقت پر واپس نہیں لوٹا اور اس سے رابطہ منقطع ہونے پر اسے لاپتہ قرار دیا گیا، جس کے بعد فوری طور پر سرچ اینڈ ریسکیو مشن شروع کیا گیا۔
ایران کے پاس 50 ہزار میزائل، امریکا اور اسرائیل کے مہنگے دفاعی سسٹمز پر دباؤ بڑھ گیا
واضح رہے کہ حالیہ عرصے میں بھارتی فضائیہ کو کئی جنگی طیاروں کے حادثات کا سامنا رہا ہے۔ تقریباً دس روز قبل تیجس لائٹ کومبیٹ ایئرکرافٹ ایک فضائی اڈے پر لینڈنگ کے دوران رن وے سے پھسل کر شدید نقصان کا شکار ہو گیا تھا۔ اس سے قبل گزشتہ سال نومبر میں دبئی ایئر شو کے دوران بھی ایک تیجس طیارہ مظاہرے کی پرواز کے دوران گر کر تباہ ہو گیا تھا، جس کے نتیجے میں پائلٹ ہلاک ہو گیا تھا۔
سخوئی Su-30MKI دو انجنوں والا ملٹی رول جنگی طیارہ ہے، جسے روسی کمپنی نے تیار کیا ہے۔ اس میں بھارتی، فرانسیسی اور اسرائیلی ایویونکس اور ہتھیاروں کے نظام شامل ہیں۔ یہ طیارہ دو ہزار کی دہائی کے اوائل میں بھارتی فضائیہ میں شامل کیا گیا اور فضائیہ کے سب سے طاقتور فرنٹ لائن طیاروں میں شمار ہوتا ہے۔
