پاکستان تحریک انصاف کے چیئرمین بیرسٹر گوہر نے واضح کیا ہے کہ علی امین گنڈاپور کے خلاف پارٹی کی جانب سے کسی قسم کی کارروائی کا کوئی فیصلہ نہیں کیا گیا۔
کارروائی کی تردید
اپنے بیان میں بیرسٹر گوہر نے کہا کہ علی امین گنڈاپور کے خلاف کارروائی سے متعلق خبریں بے بنیاد اور من گھڑت ہیں۔ ان کا کہنا تھا کہ پارٹی قیادت نے ایسا کوئی فیصلہ نہیں کیا اور نہ ہی اس حوالے سے کوئی باضابطہ اقدام زیر غور ہے۔
اندرونی اختلافات پر مؤقف
چیئرمین پی ٹی آئی کے مطابق انہوں نے علی امین گنڈاپور سے گزارش کی ہے کہ پارٹی اندرونی اختلافات کی متحمل نہیں ہو سکتی۔ انہوں نے کہا کہ علی امین گنڈاپور نے اپنے ویڈیو بیان میں معذرت کرکے بڑے پن کا مظاہرہ کیا، جو مثبت پیش رفت ہے۔
پی ٹی آئی کا علی امین گنڈاپور کے بیانات پر ایکشن
پس منظر
یاد رہے کہ علی امین گنڈاپور نے ایک بیان میں کہا تھا کہ عوامی مقبولیت کے باوجود پارٹی اپنے بانی کو جیل سے رہا نہیں کروا پا رہی، جس پر مختلف حلقوں میں بحث شروع ہو گئی تھی۔ بعد ازاں انہوں نے اپنے بیان پر معذرت کرتے ہوئے کہا کہ اگر ان کے الفاظ سے کسی کی دل آزاری ہوئی ہو تو وہ معذرت خواہ ہیں، تاہم ان کا غصہ جائز تھا۔
انہوں نے یہ بھی مؤقف اختیار کیا کہ ابھی تک پارٹی بانی کو ذاتی معالج فراہم کرنے کی درخواست بھی پوری نہیں ہو سکی۔
پارٹی کی ترجیح
بیرسٹر گوہر کے مطابق پارٹی کی اولین ترجیح بانی چیئرمین عمران خان کی رہائی ہے، اور تمام توجہ اسی مقصد پر مرکوز رہنی چاہیے۔
