احتساب عدالت لاہور نے گجرات کے ترقیاتی منصوبوں میں مبینہ کرپشن کے ریفرنس میں اشتہاری ملزم مونس الہٰی کے اثاثے ضبط کرنے کے خلاف دائر درخواست پر قومی احتساب بیورو (نیب) سے جواب طلب کر لیا ہے۔
یہ سماعت احتساب عدالت کے جج رانا محمد عارف نے سابق وزیراعلیٰ پنجاب چودھری پرویز الہٰی اور دیگر ملزمان کے خلاف دائر ریفرنس پر کی۔ سماعت کے دوران سابق پرنسپل سیکرٹری پنجاب اسمبلی محمد خان بھٹی سمیت دیگر ملزمان عدالت میں پیش ہوئے۔
عدالت میں نیب کی جانب سے نئے ملزم سلمان احمد سے متعلق سپلیمنٹری ریفرنس بھی جمع کرا دیا گیا، جس کے بعد عدالت نے تمام ملزمان کو سپلیمنٹری ریفرنس کی نقول فراہم کر دیں۔
دوران سماعت عدالت نے مونس الہٰی کے اثاثے ضبط کرنے کے خلاف دائر درخواست پر نیب سے تحریری جواب طلب کرتے ہوئے سماعت ملتوی کر دی۔
منی لانڈرنگ کیس: مونس الہٰی کی دوبارہ گرفتاری کے لئے اقدامات کرنے کا حکم
مونس الہٰی کی والدہ قیصرہ الہٰی نے اثاثوں کے خلاف نیب کی کارروائی کو عدالت میں چیلنج کر رکھا ہے۔ قیصرہ الہٰی کو مونس الہٰی کی جانب سے مختارِ عام مقرر کیا گیا ہے۔
عدالت نے ریفرنس کی مزید سماعت 8 جنوری تک ملتوی کر دی۔ واضح رہے کہ نیب نے سابق وزیراعلیٰ پنجاب چودھری پرویز الہٰی سمیت دیگر ملزمان کے خلاف اختیارات کے ناجائز استعمال اور مبینہ کرپشن کا ریفرنس دائر کر رکھا ہے۔
