متحدہ عرب امارات کے صدر شیخ محمد بن زاید النہیان آج پاکستان پہنچ گئے اور ان کا طیارہ نورخان ایئربیس پر لینڈ کر گیا۔
ان کے دورے کو دونوں ممالک کے درمیان سفارتی تعلقات کو نئی جہت دینے والا قرار دیا جا رہا ہے اور یہ دورہ پاکستان اور یو اے ای کے دیرینہ برادرانہ تعلقات کی عکاسی کرتا ہے۔
صدر مملکت آصف علی زرداری، وزیراعظم شہباز شریف اور دیگر اعلیٰ شخصیات سے ملاقاتیں شیڈول ہیں، جبکہ وفد کے ہمراہ وزرا اور سینئر حکام بھی موجود ہیں۔ دفتر خارجہ کی جانب سے جاری بیان میں کہا گیا کہ اس اہم دورے کے دوران دوطرفہ تعلقات، خطے اور عالمی سطح پر باہمی دلچسپی کے امور پر تبادلہ خیال کیا جائے گا۔
وفاقی دارالحکومت میں معزز مہمان کی آمد کے موقع پر آج اسلام آباد میں عام تعطیل کا اعلان کیا گیا تھا تاکہ استقبال اور حفاظتی انتظامات کو یقینی بنایا جا سکے۔
یو اے ای کے صدر شیخ محمد بن زاید النہیان آج سرکاری دورے پر پاکستان پہنچیں گے
دوسری جانب وزیراعلیٰ پنجاب مریم نواز شریف نے بھی اماراتی صدر کے دورہ پاکستان کا خیر مقدم کرتے ہوئے اہل پنجاب کی جانب سے انہیں خوش آمدید کہا۔ انہوں نے کہا کہ پاکستان اور متحدہ عرب امارات کے تعلقات لازوال اور بے مثال ہیں اور صدر محمد بن زاید النہیان کا پہلا سرکاری دورہ فخر کا باعث ہے۔
مریم نواز شریف نے مزید کہا کہ اس دورے کے نتیجے میں دونوں ممالک کے درمیان سیاسی، اقتصادی اور تجارتی تعلقات مزید مستحکم ہوں گے اور باہمی تعاون کو نئی رفتار ملے گی۔ انہوں نے کہا کہ پاکستانی عوام کی جانب سے صدر شیخ محمد بن زاید النہیان کا پرجوش خیرمقدم کیا جاتا ہے۔
