راولپنڈی کی انسدادِ دہشتگردی عدالت نے 9 مئی کو جی ایچ کیو پر حملے کے کیس میں پاکستان تحریک انصاف کے 18 غیر حاضر ملزمان کو اشتہاری قرار دے دیا ہے۔
عدالتی فہرست کے مطابق اشتہاری قرار دیے جانے والوں میں سابق وفاقی وزرا شبلی فراز، عمر ایوب، زرتاج گل، سابق ایم این اے کنول شوذب اور شیخ راشد شفیق شامل ہیں۔
اس کے علاوہ جن افراد کو اشتہاری قرار دیا گیا ہے ان میں مہر جاوید، محمد احمد چٹھہ، رائے حسن نواز، بلال اعجاز، مرتضیٰ خان، اشرف سوہنا، چوہدری آصف، شکیل نیازی، محمد انصر اقبال، حیدر محمود، شاہیر سکندر اور حمزہ لطیف بھی شامل ہیں۔
بانی پی ٹی آئی سے ملاقات نہ کروانے پر اسلام آباد ہائیکورٹ میں توہین عدالت کی درخواست
عدالت نے تمام ملزمان کی غیرمنقولہ جائیداد ضبط کرنے کا حکم جاری کرتے ہوئے متعلقہ اضلاع کے ریونیو افسران کو جائیداد قرق کرنے کی ہدایات بھی دے دی ہیں۔
فیصلے کے مطابق اگر ملزمان مقررہ مدت میں عدالت کے سامنے پیش نہ ہوئے تو ان کی جائیداد نیلام کر دی جائے گی۔ عدالت نے ملزمان کے ضامنوں کو بھی نوٹس جاری کرتے ہوئے انہیں جواب داخل کرانے کی ہدایت کی ہے۔
