نیویارک: اقوام متحدہ کے سیکرٹری جنرل انتونیو گوتریس نے فلسطینی عوام سے یکجہتی کے عالمی دن کے موقع پر انتباہ جاری کرتے ہوئے کہا ہے کہ مقبوضہ علاقوں میں اسرائیلی فوجی کارروائیاں جاری ہیں جو انتہائی تشویشناک ہیں۔
انہوں نے مغربی کنارے میں فلسطینیوں کے قتل عام، بار بار بے گھری اور انسانی امداد میں رکاوٹ کو "ناقابلِ قبول” قرار دیا اور تمام فریقین سے مطالبہ کیا کہ حالیہ جنگ بندی پر مکمل عمل درآمد کیا جائے۔ انتونیو گوتریس نے غزہ میں بڑے پیمانے پر انسانی امداد کی فوری رسائی یقینی بنانے، فلسطینی سرزمین پر غیر قانونی قبضے کے خاتمے، اور دو ریاستی حل کی جانب پیشرفت پر زور دیا۔
اقوام متحدہ کی رپورٹ کے مطابق گزشتہ دو سال میں اسرائیلی فورسز اور آبادکاروں نے مقبوضہ مغربی کنارے میں ایک ہزار سے زائد فلسطینیوں کو شہید کیا ہے۔
ادھر لندن میں فلسطینیوں سے اظہار یکجہتی کے لیے ہزاروں افراد نے ریلی نکالی۔ مظاہرین نے ہائیڈ پارک سے وائٹ ہال تک مارچ کرتے ہوئے اسرائیلی جارحیت کے خلاف نعرے لگائے اور برطانوی حکومت سے اسرائیل کو اسلحہ فروخت روکنے کا مطالبہ کیا۔ مظاہرین نے عالمی برادری سے غزہ میں انسانی امداد کی رسائی یقینی بنانے کا بھی مطالبہ کیا۔
