وفاقی حکومت نے سولر سسٹم کے ذریعے بجلی پیدا کرنے والے صارفین پر نافذ کیے گئے 16 فیصد جنرل سیلز ٹیکس (جی ایس ٹی) کو عارضی طور پر مؤخر کر دیا ہے۔ یہ فیصلہ سولر صارفین کی جانب سے دائر نظرثانی درخواست منظور ہونے کے بعد کیا گیا۔
صدر مملکت نے سولر جی ایس ٹی سے متعلق اپیل منظور کرتے ہوئے کیس کو دوبارہ سماعت کے لیے وفاقی ٹیکس محتسب کو بھجوا دیا اور ہدایت کی کہ اس معاملے کی نئے سرے سے تفصیلی جانچ کی جائے۔
قبل ازیں بجلی کی تمام تقسیم کار کمپنیوں نے وفاقی ٹیکس محتسب کے فیصلے کے خلاف اپیل دائر کی تھی، جس کے بعد سولر سسٹم استعمال کرنے والے صارفین پر ٹیکس نافذ کر دیا گیا تھا۔ اس ٹیکس کے نتیجے میں صارفین کو بھاری ادائیگیاں کرنا پڑ رہی تھیں، جس پر شدید تشویش کا اظہار کیا جا رہا تھا۔
وفاقی ٹیکس محتسب نے رواں سال فروری میں ٹیکس وصولی کا حکم جاری کیا تھا، تاہم صدر مملکت نے رواں ماہ دائر کی گئی نظرثانی درخواست منظور کرتے ہوئے ٹیکس کے نفاذ پر نظرثانی اور نئے سرے سے سماعت کی منظوری دی ہے۔
