محکمہ داخلہ پنجاب نے صوبے بھر میں دفعہ 144 کے نفاذ میں مزید 7 روز کی توسیع کر دی ہے۔جاری نوٹیفکیشن کے مطابق پنجاب میں ہر قسم کے احتجاج، جلسے، جلوس، ریلیوں، دھرنوں اور عوامی اجتماعات پر مکمل پابندی برقرار رہے گی۔
دفعہ 144 کے تحت چار یا زائد افراد کے عوامی مقامات پر جمع ہونے پر بھی مکمل پابندی ہوگی۔
حکومتی اعلامیے میں کہا گیا ہے کہ ہر قسم کے اسلحہ کی نمائش، لاؤڈ اسپیکر کے استعمال، اور اشتعال انگیز، نفرت آمیز یا فرقہ وارانہ مواد کی اشاعت و تقسیم پر بھی مکمل پابندی عائد رہے گی۔
محکمہ داخلہ کے مطابق دفعہ 144 میں توسیع کا فیصلہ امن و امان کے قیام اور انسانی جانوں و املاک کے تحفظ کیلئے کیا گیا ہے۔ حکومتی اعلامیے میں کہا گیا ہے کہ عوامی احتجاج یا دھرنے دہشت گرد عناصر کیلئے سافٹ ٹارگٹ بن سکتے ہیں، لہٰذا کسی بھی ناخوشگوار واقعے سے بچنے کیلئے احتیاطی اقدامات ضروری ہیں۔
نوٹیفکیشن میں واضح کیا گیا ہے کہ پابندی کا اطلاق شادی کی تقریبات، جنازوں اور تدفین پر نہیں ہوگا، جبکہ سرکاری فرائض انجام دینے والے افسران، اہلکار اور عدالتیں بھی اس پابندی سے مستثنیٰ ہیں۔
لاؤڈ اسپیکر صرف اذان اور جمعہ کے خطبے کیلئے استعمال کیے جا سکیں گے۔محکمہ داخلہ پنجاب نے دفعہ 144 کے نفاذ کی مدت 15 نومبر تک بڑھانے کا باضابطہ نوٹیفکیشن جاری کر دیا ہے اور عوامی آگاہی کیلئے اس فیصلے کی بڑے پیمانے پر تشہیر کی ہدایت کی ہے۔
