اسلام آباد: اسلام آباد پولیس کے ایس پی عدیل اکبر نے مبینہ طور پر خود کو گولی مار کر خودکشی کرلی۔ پولیس ذرائع کے مطابق، ایس پی عدیل اکبر گن مین سے بندوق چھیننے کی کوشش کے دوران زخمی ہوگئے اور بعد میں خود کو گولی مار دی۔
زخمی حالت میں انہیں فوری طور پر پمز ہسپتال منتقل کیا گیا، جہاں وہ جانبر نہ ہو سکے۔ ایس پی عدیل اکبر اسلام آباد پولیس میں بطور ایس پی انڈسٹریل ایریا خدمات سرانجام دے رہے تھے۔
واقعے سے کچھ دیر قبل ہی وہ حاجی کیمپ میں سکیورٹی صورتحال کا جائزہ لے رہے تھے۔ اسلام آباد پولیس کی جانب سے آج ہی ایک سوشل میڈیا پوسٹ جاری کی گئی تھی، جس میں ایس پی عدیل اکبر کی تصاویر بھی شامل تھیں۔
پوسٹ کے مطابق، ایس پی عدیل اکبر نے حاجی کیمپ کا دورہ کیا، ڈیوٹی پر مامور افسران سے ملاقات کی، سکیورٹی انتظامات کا تفصیلی جائزہ لیا اور ڈیوٹی افسران کو الرٹ رہنے کی ہدایات دی تھیں۔
