کراچی: ایف آئی اے کی کارپوریٹ کرائم سرکل کراچی نے جناح انٹرنیشنل ائرپورٹ کے پارکنگ ایریا میں کارروائی کرتے ہوئے غیر قانونی کرنسی ایکسچینج میں ملوث دو ملزمان اسامہ عابد اور محمود بٹ کو گرفتار کر لیا۔
ترجمان ایف آئی اے کے مطابق کارروائی ڈی جی ایف آئی اے کی ہدایت پر انجام دی گئی۔ گرفتار ملزمان بغیر لائسنس غیر قانونی کرنسی ایکسچینج کا کاروبار کر رہے تھے۔ ان کے قبضے سے ایک لاکھ امریکی ڈالرز برآمد ہوئے، جن کی مالیت تقریباً دو کروڑ اسی لاکھ روپے سے زائد بتائی جا رہی ہے۔
ملزمان کے موبائل فونز اور دیگر شواہد بھی قبضے میں لے لیے گئے ہیں، جو غیر قانونی لین دین کے ثبوت فراہم کرتے ہیں۔ ایف آئی اے حکام نے کہا کہ دونوں ملزمان برآمد شدہ کرنسی کے ذرائع کے بارے میں مطمئن نہیں ہو سکے۔
سوشل میڈیا کے ذریعے پاکستانی و غیر ملکی شہریوں کو لوٹنے والے 20 ملزمان گرفتار
ملزمان کے خلاف ایف آئی اے نے مقدمہ درج کر کے تفتیش شروع کر دی ہے، جبکہ دیگر ممکنہ ملوث افراد کی گرفتاری کے لیے چھاپے بھی جاری ہیں۔ حکام کا کہنا ہے کہ اس کارروائی کا مقصد حوالہ ہنڈی اور غیر قانونی کرنسی ایکسچینج کے نیٹ ورک کو توڑنا اور مالی جرائم کے سدِباب کے لیے مؤثر اقدامات کرنا ہے۔
