راولپنڈی کی انسداد دہشت گردی عدالت میں 9 مئی کے جی ایچ کیو حملہ کیس کی سماعت کے دوران پاکستان تحریکِ انصاف کے بانی عمران خان نے عدالت میں پیش ہونے سے انکار کر دیا۔ جج امجد علی شاہ نے اڈیالہ جیل میں سماعت کی، جہاں فریقین کے وکلا موجود تھے، مگر عمران خان کی عدم پیشی نے کارروائی کو متاثر کیا۔
عدالت نے عمران خان کو پیشی کے لیے تین مرتبہ پیغام بھجوایا، تاہم جیل حکام نے آگاہ کیا کہ عمران خان کی طبیعت ناساز ہے اور وہ پیش نہیں ہو سکتے۔ عمران خان کی قانونی ٹیم کی جانب سے وکیل فیصل ملک جبکہ پراسیکیوشن کی طرف سے اسپیشل پراسیکیوٹر ظہیر شاہ عدالت میں موجود رہے۔
عدالت نے وکلا صفائی کو بتایا کہ کیس کا جیل ٹرائل دوبارہ بحال کر دیا گیا ہے، اور آج کی سماعت کا مقصد عمران خان کی حاضری لگانا تھا۔ مگر ان کی غیر حاضری کے باعث پراسیکیوشن ٹیم اور دفاعی وکلا تقریباً ایک گھنٹہ 40 منٹ تک انتظار کرتے رہے۔
9 مئی جی ایچ کیو حملہ کیس: عمران خان کی ٹرائل روکنے کی درخواست خارج
عمران خان کی عدم حاضری پر دلائل سننے کے بعد انسداد دہشتگردی عدالت کے جج نے سماعت بغیر کسی کارروائی کے 20 اکتوبر تک ملتوی کر دی۔ واضح رہے کہ 9 مئی کے پرتشدد واقعات کے بعد عمران خان پر مختلف مقدمات درج ہیں جن میں جی ایچ کیو حملہ کیس بھی شامل ہے۔
