نئی دہلی: بھارت اور چین کے درمیان پانچ سال بعد براہِ راست پروازیں بحال کرنے کا فیصلہ کر لیا گیا ہے۔ حکام کے مطابق بکنگ کا آغاز آج سے کر دیا گیا ہے جبکہ پروازیں اکتوبر کے آخر تک دوبارہ شروع ہوں گی۔
غیر ملکی خبر رساں ادارے اے ایف پی کے مطابق، بھارت اور چین کے درمیان فضائی سروس 2020 میں کووِڈ-19 وبا کے دوران معطل کر دی گئی تھی، جب دونوں ممالک کے درمیان سرحدی کشیدگی میں بھی اضافہ ہوا تھا۔ تاہم اب تعلقات میں بتدریج بہتری آنے کے بعد فضائی رابطے بحال کرنے پر اتفاق ہوا ہے۔
بھارتی وزارتِ ہوا بازی کے مطابق، پروازوں کی بحالی سے عوامی روابط، سیاحت اور تجارتی تعلقات کو فروغ ملے گا۔ بیان میں کہا گیا ہے کہ یہ اقدام دوطرفہ تعلقات کو معمول پر لانے کی جانب ایک اہم قدم ہے۔
بھارتی ایئرلائن انڈیگو (IndiGo) نے اعلان کیا ہے کہ وہ 26 اکتوبر سے کولکتہ اور گوانگژو کے درمیان روزانہ براہِ راست پروازیں شروع کرے گی۔ ایئرلائن کا کہنا ہے کہ بعد ازاں اس سروس کو نئی دہلی تک توسیع دینے کا بھی منصوبہ ہے۔
انڈیگو کے مطابق، یہ پروازیں سرحد پار تجارت اور کاروباری شراکت داریوں کو دوبارہ فعال کرنے میں مددگار ثابت ہوں گی۔
خیال رہے کہ چین اور بھارت کے تعلقات 2020 میں ہمالیہ کی متنازع سرحد پر جھڑپ کے بعد شدید تناؤ کا شکار ہو گئے تھے، جس میں 20 بھارتی اور 4 چینی فوجی ہلاک ہوئے تھے۔ تاہم حالیہ برسوں میں دونوں ممالک نے مذاکرات، تجارتی تعاون اور مذہبی سیاحت کے ذریعے تعلقات میں نرمی پیدا کرنے کی کوشش کی ہے۔
