اسلام آباد: وزیراعظم محمد شہباز شریف دو روزہ سرکاری دورے پر کوالالمپور (ملائیشیا) روانہ ہو گئے۔
وزیراعظم کے ہمراہ نائب وزیراعظم و وزیر خارجہ اسحاق ڈار، وفاقی وزیر اطلاعات و نشریات عطاء اللہ تارڑ اور وزیراعظم کے معاونِ خصوصی طارق فاطمی بھی موجود ہیں۔
وزیراعظم پاکستان یہ دورہ ملائیشیا کے وزیراعظم انور ابراہیم کی دعوت پر کر رہے ہیں۔
دورے کے دوران دونوں ممالک کے وزرائے اعظم کے درمیان دو طرفہ ملاقات کے علاوہ وفود کی سطح پر مذاکرات بھی ہوں گے، جن میں باہمی تعاون کو فروغ دینے کے مختلف پہلوؤں پر بات چیت ہوگی۔
ذرائع کے مطابق پاکستان اور ملائیشیا کے درمیان تجارت، آئی ٹی و ٹیلی کام، حلال انڈسٹری، سرمایہ کاری، تعلیم، توانائی، انفرااسٹرکچر اور ڈیجیٹل معیشت سمیت مختلف شعبوں میں تعاون بڑھانے کے لیے متعدد معاہدوں اور مفاہمتی یادداشتوں (MoUs) پر دستخط ہوں گے۔
دونوں رہنما عوام سے عوام کے روابط (People-to-People Contacts) کو مزید مضبوط بنانے اور نئے تعاون کے مواقع تلاش کرنے پر بھی گفتگو کریں گے۔
یہ دورہ پاکستان اور ملائیشیا کے درمیان دیرینہ برادرانہ تعلقات کو نئی جہت دینے اور معاشی و تجارتی شراکت داری کو وسعت دینے کے حوالے سے اہم سنگِ میل ثابت ہوگا۔
