نمیبیا اور زمبابوے نے آئی سی سی مینز ٹی ٹوئنٹی ورلڈ کپ 2026 میں شرکت کے لیے کوالیفائی کر لیا ہے۔ دونوں ٹیموں نے افریقی کوالیفائرز کے سیمی فائنلز میں شاندار کامیابیاں حاصل کیں۔
نمیبیا نے اپنے سیمی فائنل میں تنزانیہ کو باآسانی شکست دی، جس کے بعد وہ مسلسل چوتھی بار ٹی ٹوئنٹی ورلڈ کپ کے لیے کوالیفائی کرنے میں کامیاب ہو گئی ہے۔ اس سے قبل نمیبیا نے 2021، 2022 اور 2024 کے ایڈیشنز میں بھی شرکت کی تھی۔
دوسری جانب زمبابوے نے دوسرے سیمی فائنل میں کینیا کو 7 وکٹوں سے ہرا کر ورلڈ کپ میں جگہ بنائی۔ زمبابوے کی ٹیم گزشتہ کچھ عرصے میں بین الاقوامی سطح پر متحرک رہی ہے اور اب ایک بار پھر عالمی اسٹیج پر واپسی کے لیے تیار ہے۔
اس سے قبل یورپی کوالیفائرز میں حیران کن کارکردگی دکھاتے ہوئے اٹلی نے پہلی بار مینز ٹی ٹوئنٹی ورلڈ کپ کے لیے کوالیفائی کرکے تاریخ رقم کی، جب کہ نیدرلینڈز بھی یورپ سے ورلڈ کپ کھیلنے والی ٹیموں میں شامل ہو چکی ہے۔
آئی سی سی کے مطابق ٹی ٹوئنٹی ورلڈ کپ 2026 میں 20 ٹیمیں حصہ لیں گی۔ میزبان بھارت اور سری لنکا کے علاوہ پچھلے ایڈیشن کے سپر ایٹ مرحلے میں رسائی حاصل کرنے والی ٹیمیں — آسٹریلیا، افغانستان، بنگلادیش، انگلینڈ، جنوبی افریقا، ویسٹ انڈیز، نیوزی لینڈ اور امریکا — براہِ راست ایونٹ میں شامل ہوں گی۔
اس کے علاوہ پاکستان، آئرلینڈ اور نیوزی لینڈ (رینکنگ کی بنیاد پر) بھی ٹورنامنٹ کا حصہ ہوں گے۔ باقی تین ٹیموں کا فیصلہ ایشیا، امریکا اور ایسٹ ایشیا پیسیفک ریجن کے کوالیفائرز سے کیا جائے گا۔
ٹی 20 ورلڈ کپ 2026 میں ٹیموں کی بڑھتی ہوئی تعداد اور نئے ممالک کی شمولیت نے نہ صرف کرکٹ کے دائرہ کار کو وسعت دی ہے بلکہ شائقین کے جوش و خروش میں بھی زبردست اضافہ کیا ہے۔
