پنجاب کے ضلع حافظ آباد کی تحصیل پنڈی بھٹیاں میں ٹیوشن سینٹر کی چھت گرنے سے افسوسناک حادثہ پیش آیا جس میں 5 بچوں سمیت 7 افراد جاں بحق ہوگئے، جاں بحق ہونے والوں میں خاتون ٹیچر اور ان کا بیٹا بھی شامل ہیں۔
ڈان نیوز کے مطابق واقعہ سکھیکی منڈی کے محلہ فاروق اعظم میں پیش آیا، جہاں گھر کی چھت اچانک زمین بوس ہوگئی۔ اس وقت ماں اور بیٹا بچوں کو ٹیوشن پڑھا رہے تھے کہ وہ اور کئی طلبہ ملبے تلے دب گئے۔
حادثے کی اطلاع ملتے ہی ریسکیو ٹیمیں جائے وقوعہ پر پہنچیں اور زخمیوں و لاشوں کو تحصیل ہیڈکوارٹر اسپتال منتقل کیا۔ ریسکیو ذرائع کے مطابق ابتدائی طور پر 3 بچوں کی موت کی تصدیق ہوئی تھی، تاہم دورانِ علاج مزید زخمی دم توڑ گئے جس کے بعد اموات کی تعداد 7 ہوگئی۔
جاں بحق افراد میں 60 سالہ سرور بی بی، 9 سالہ عبدالرحمٰن، 5 سالہ عمر، 4 سالہ روہان، 8 سالہ ریحان سمیت دیگر شامل ہیں۔
ڈسٹرکٹ پولیس آفیسر حافظ آباد عاطف نذیر فوری طور پر موقع پر پہنچے اور امدادی سرگرمیوں کی نگرانی کی۔ انہوں نے ریسکیو اداروں کو ہدایت دی کہ ملبہ ہٹانے اور زخمیوں کو طبی امداد دینے میں کوئی کسر نہ چھوڑی جائے۔
ڈی پی او نے سانحے پر گہرے دکھ اور افسوس کا اظہار کرتے ہوئے جاں بحق افراد کے لواحقین سے تعزیت کی۔
