ڈی آئی خان، جمعیت علمائے اسلام (جے یو آئی) کی جانب سے سیاسی اتحاد کے بغیر اپنی تحریک خود چلانے کا فیصلہ کر لیاگیا ہے۔
ڈیرہ اسماعیل خان میں اپنی رہائشگاہ پر میڈیا سے گفتگو کے دوران سربراہ جمعیت علمائے اسلام (ف) مولانا فضل الرحمان کا یہ کہنا تھا کہ جے یو آئی (ف) سیاسی اتحاد کے بغیر اپنی تحریک خود چلائے گی۔
مولانا فضل الرحمان نے کہا کہ ماضی قریب میں سیاسی اتحادوں کے تجربے اچھے نہیں رہے ہیں، ہم مزید نہ کسی کو مایوس کرنا چاہتے ہیں اور نہ خود ہونا چاہتے ہیں۔
سربراہ جے یو آئی (ف) کا کہنا ہے کہ پارلیمنٹ کے اندر اور باہر اپوزیشن کا کردار ادا کریں گے، مسائل کے متعلق دیگر سیاسی جماعتوں سے اتحاد ہو سکتا ہے، اسٹیبلشمنٹ کی جانب سے اب جا کر اپنے داخلی معاملات کو سنجیدگی سے لیا گیا ہے۔
مولانا فضل الرحمان کا یہ کہنا تھا کہ اگر ہمیں سیاست میں مداخلت نہ کرنے کی ضمانت دے دی جائے تو ہمیں اپنی شکست پر کوئی اعتراض نہیں ہوگا، ہمیں پورے ملک کے انتخابی نتائج پر اعتراضات ہیں، ہم موجودہ حکومت سے کیا مذاکرات کریں انکے پاس اختیار ہی نہیں ہے۔
سربراہ جے یو آئی(ف) کا یہ کہنا تھا کہ ملک کا سیاسی عدم استحکام معیشت پرسختی سے اثر انداز ہو رہا ہے، اگر ریاست ہی غیر مستحکم ہو جائے تو بنگلہ دیش جیسے حالات پیدا ہو جاتے ہیں، لیکن ہم ان حالات کی طرف جانا نہیں چاہتے۔
