پی ٹی آئی نے نااہل ارکان کے حلقوں میں ضمنی انتخابات کے بائیکاٹ اور لاہور کے حلقہ این اے 129 سے الیکشن لڑنے کا اعلان کیا ہے، سیاسی کمیٹی نے فیصلہ بانی پی ٹی آئی کی مشاورت سے کیا۔
اسلام آباد: پاکستان تحریک انصاف (پی ٹی آئی) نے نااہل ارکان کی نشستوں پر ہونے والے ضمنی انتخابات کے بائیکاٹ کا فیصلہ کیا ہے جبکہ لاہور کے حلقہ این اے 129 سے ضمنی الیکشن میں حصہ لینے کا اعلان کر دیا ہے۔
سیاسی کمیٹی کے اعلامیے میں کہا گیا ہے کہ بانی پی ٹی آئی نے کمیٹی پر مکمل اعتماد کا اظہار کیا ہے اور سیاسی معاملات مزید مشاورت کے لیے کمیٹی کے سپرد کر دیے گئے ہیں۔ اعلامیے میں توشہ خانہ کیس کی اڈیالہ جیل میں روزانہ سماعت پر تشویش ظاہر کرتے ہوئے کہا گیا کہ روزانہ سماعت سے انصاف کی فراہمی اور ملزمان کے بنیادی حقوق متاثر ہوں گے۔
اعلامیے کے مطابق 9 مئی کے مقدمات میں نااہل قرار دیے گئے ارکان کو پی ٹی آئی اپنا حقیقی نمائندہ سمجھتی ہے اور ان کو خراج تحسین پیش کرتی ہے۔ تاہم پارٹی نے واضح کیا کہ لاہور کے حلقہ این اے 129، جو میاں اظہر کی وفات کے باعث خالی ہوا، وہاں الیکشن میں امیدوار کھڑا کیا جائے گا۔
پی ٹی آئی کا ستمبر میں بانی پی ٹی آئی کی رہائی کے لیے بڑا جلسہ کرنے کا اعلان
مزید کہا گیا ہے کہ بانی پی ٹی آئی کی ہدایت پر قومی اسمبلی کی پبلک اکاؤنٹس کمیٹی سے استعفے دیے جا رہے ہیں جبکہ ارکان اسمبلی کو تمام قائمہ کمیٹیوں کی چیئرمین شپ اور رکنیت سے بھی مستعفی ہونے کی ہدایت جاری کی گئی ہے۔
