دادو: شہید میر مرتضیٰ بھٹو کے صاحبزادے ذوالفقار علی بھٹو جونیئر نے لاڑکانہ سے اپنا پہلا انتخاب لڑنے کا باضابطہ اعلان کر دیا ہے۔
دادو میں میڈیا سے گفتگو کرتے ہوئے ذوالفقار جونیئر کا کہنا تھا کہ وہ کسی سیاسی اتحاد یا جماعت کے سہارے نہیں بلکہ عوامی طاقت سے اقتدار میں آنا چاہتے ہیں۔ انہوں نے کہا کہ سندھ کی زمینوں اور قدرتی وسائل پر لوٹ مار اور قبضے کو ہرگز برداشت نہیں کیا جائے گا۔
انہوں نے اس عزم کا اظہار کیا کہ وہ امیروں جیسی سیاست نہیں کریں گے، بلکہ شہید مرتضیٰ بھٹو کے نظریے کو نئی سوچ کے ساتھ آگے بڑھائیں گے۔ "ہم نئی سوچ اور عوامی طاقت سے تبدیلی لائیں گے۔”
ذوالفقار جونیئر نے لاڑکانہ سے الیکشن لڑنے کا اعلان تو کر دیا، تاہم انہوں نے یہ واضح نہیں کیا کہ وہ قومی اسمبلی یا صوبائی اسمبلی کی کس نشست سے میدان میں اتریں گے۔
یاد رہے کہ لاڑکانہ کی سیاسی تاریخ بھٹو خاندان سے جڑی ہوئی ہے۔ یہاں سے ماضی میں ذوالفقار علی بھٹو، محترمہ بے نظیر بھٹو اور حالیہ عام انتخابات 2024 میں بلاول بھٹو زرداری منتخب ہو چکے ہیں۔ لاڑکانہ سے قومی اسمبلی کی 2 جبکہ صوبائی اسمبلی کی 4 نشستیں موجود ہیں۔
ذوالفقار جونیئر کے سیاسی میدان میں آنے کو بھٹو خاندان کی ایک نئی نسل کا آغاز قرار دیا جا رہا ہے، جس پر عوام اور تجزیہ کاروں کی گہری نظر ہے۔
