لاہور، وزیراعلیٰ پنجاب نے وِیٹ این سینٹیو پروگرام کا آغاز کر دیا، جس کے تحت کسانوں کو بلا معاوضہ ٹریکٹر دیے جا رہے ہیں۔
وزیراعلیٰ مریم نواز شریف نے "گندم اگاؤ” انعامی سکیم کے لیے ڈیجیٹل قرعہ اندازی کا بٹن دبا کر افتتاح کیا۔ اس پروگرام کے تحت گندم کے کاشتکاروں میں ایک ہزار مفت ٹریکٹر تقسیم کیے جائیں گے۔ قرعہ اندازی میں پہلا ٹریکٹر بہاولنگر کی خاتون کسان کوثر پروین کے نام نکلا۔
مریم نواز شریف نے کامیاب کسانوں کو خود فون کرکے خوشخبری سنائی۔ جھنگ کے محمد اقبال کو بھی مفت ٹریکٹر جیتنے پر مبارکباد دی، جس پر کسان نے ان کا شکریہ ادا کیا۔
منڈی بہاؤالدین کے کامیاب کاشتکار سلمان احمد سے گفتگو کرتے ہوئے مریم نواز نے کہا کہ قرعہ اندازی میں آپ کا ٹریکٹر نکل آیا ہے، اس خوشی میں میں نے خود فون کر کے مبارکباد دینا مناسب سمجھا۔ انہوں نے مزید کہا کہ انشاءاللہ گندم کی فصل اچھی ہوگی اور میری نیک تمنائیں تمام کسان بھائیوں کے ساتھ ہیں۔
بریفنگ میں بتایا گیا کہ "گندم اگاؤ” سکیم کے تحت ساڑھے بارہ ایکڑ یا اس سے زیادہ زمین رکھنے والے 57,733 کسانوں نے درخواست دی، جن میں سے 21,496 کاشتکار قرعہ اندازی کے لیے اہل قرار پائے۔ خوش نصیب ایک ہزار کسانوں کو 55 ہارس پاور کے ٹریکٹر بلا معاوضہ دیے جائیں گے۔
اجلاس میں مزید بتایا گیا کہ رواں سال پنجاب میں 5 لاکھ 60 ہزار ایکڑ پر گندم کی کاشت کی گئی ہے اور آئندہ تین ماہ کے اندر تمام کامیاب کسانوں کو ٹریکٹر فراہم کر دیے جائیں گے۔
