سوشل میڈیا پر منفی پروپیگنڈا، پی ٹی آئی رہنما عمر ایوب اور علیمہ خان جے آئی ٹی میں طلب

سوشل میڈیا پر منفی پروپیگنڈا پر جوائنٹ انویسٹی گیشن ٹیم نے پاکستان تحریک انصاف کے رہنما عمر ایوب اور علیمہ خان کو طلب کر لیا۔

اسلام آباد: سوشل میڈیا پر منفی پروپیگنڈا کے معاملے پر جوائنٹ انویسٹی گیشن ٹیم (جے آئی ٹی) نے پاکستان تحریک انصاف (پی ٹی آئی) کے دو رہنماؤں، اپوزیشن لیڈر عمر ایوب اور علیمہ خان کو طلب کرلیا۔

ذرائع کے مطابق، جے آئی ٹی نے علیمہ خان کو آج 12 مارچ 2025 کو 12 بجے پیش ہونے کی ہدایت کی تھی، تاہم وہ تاحال جے آئی ٹی کے سامنے پیش نہیں ہوئیں۔ دوسری جانب، جے آئی ٹی کے اراکین پہلے سے ہی پولیس لائنز اسلام آباد میں موجود ہیں، اور تحقیقات کی سربراہی آئی جی اسلام آباد علی ناصر رضوی کر رہے ہیں۔

مزید برآں، عمر ایوب کو 13 مارچ 2025 کو پیش ہونے کا نوٹس جاری کیا گیا ہے۔ یہ جے آئی ٹی وفاقی حکومت کے احکامات پر تشکیل دی گئی ہے اور الیکٹرانک جرائم کی روک تھام کے ایکٹ 2016 کے تحت کارروائی کر رہی ہے۔ ذرائع کے مطابق، جے آئی ٹی کے پاس طلب کیے گئے رہنماؤں کے خلاف شواہد موجود ہیں۔