لاہور، وزیراطلاعات پنجاب عظمیٰ بخاری کا کہنا ہے کہ خیبرپختونخوا لاقانونیت، دہشتگردی اور کرپشن میں سبقت لے رہا ہے۔
مشیر اطلاعات خیبرپختونخوا بیرسٹر سیف کے بیان پر ردعمل دیتے ہوئے صوبائی وزیر اطلاعات پنجاب عظمیٰ بخاری نے کہا کہ 1 سال میں 365 دن ہوتے ہیں اور کے پی حکومت نے 625 منصوبے ایک سال میں شروع کردیے؟ گنڈاپور سرکار کے 625 منصوبے بھی 1 ارب درختوں کی طرح ہونگے۔
عظمیٰ بخاری کا کہنا ہے کہ 1 سال میں ایک دن بھی پختونخوا حکومت کے کسی وزیر یا وزیراعلیٰ کو نئے منصوبے کا افتتاح کرتے نہیں دیکھا، 1 سال میں 625 دفعہ تو وزیر اعلیٰ دفتر تک نہیں آئے تو کیا یہ منصوبے موکلات نے شروع کروادئیے؟
عظمیٰ بخاری نے پختونخوا حکومت کو کڑی تنقید کا نشانہ بناتے ہوئے کہا کہ جس صوبے کے پاس یونیورسٹیوں کو چلانے کا بجٹ نہیں اس کو یونیورسٹیوں کی زمینیں بیچنا پڑیں وہ 625 منصوبے شروع کرنے کا جھوٹ مت بولے، خیبرپختونخوا میں سرکاری ملازمین تنخواہوں کےلئے اور بلدیاتی نمائندے فنڈز کے لئے ہر ہفتے احتجاج کرتے ہیں۔
خیبرپختونخوا میں 1 سال کی کارکردگی دیگر صوبائی حکومتوں پر سبقت لے گئی، بیرسٹر سیف
صوبائی وزیر اطلاعات نے کہا کہ وزیراعلیٰ علی امین گنڈا پور کی ترجیحات میں صوبے کے غریب عوام نہیں اڈیالہ کا قیدی ہے، خیبرپختونخوا میں کرپشن اپنے عروج پر ہے۔
احتساب کمیٹی کے لوگ خود اس میں ملوث ہیں، گھڑیاں، انگوٹھیاں اور 190 ملین کے ڈاکے مارنے والے کی احتساب کمیٹی خود قابل احتساب ہے۔
