کیف،روسی صدر کی صحت سے متعلق افواہوں کے دوران، یوکرین کے صدر ولادیمیر زیلنسکی نے دعویٰ کیا ہے کہ ولادیمیر پیوٹن جلد وفات پا جائیں گے۔
زیلنسکی نے ایک حالیہ انٹرویو میں کہا کہ روسی صدر کی موت کے بعد یوکرین جنگ کا خاتمہ ہو جائے گا، یہ بیان ایسے وقت میں سامنے آیا ہے جب پیوٹن کی صحت کے بارے میں قیاس آرائیاں گردش کر رہی ہیں۔
کیو انڈیپنڈنٹ کے مطابق، زیلنسکی نے 26 مارچ کو پیرس میں یورپی صحافیوں سے گفتگو کے دوران کہا کہ پیوٹن جلد دنیا سے رخصت ہو جائیں گےاور ان کے جانے کے ساتھ ہی یہ سب کچھ ختم ہو جائے گا۔
یوکرینی صدر نے امریکا اور یورپی ممالک سے مطالبہ کیا کہ وہ پیوٹن پر دباؤ برقرار رکھیں اور روس کو عالمی سطح پر تنہائی سے باہر نکلنے میں مدد نہ دیں، موجودہ صورتحال انتہائی نازک ہے اور امریکا کو روس کے خلاف سخت موقف اپنانا چاہیے۔
زیلنسکی نے خبردار کیا کہ جب تک پیوٹن زندہ ہیں، وہ اقتدار پر قابض رہنا چاہیں گے اور ان کی جنگی حکمت عملی صرف یوکرین تک محدود نہیں بلکہ مغربی دنیا کے ساتھ ممکنہ تصادم کا خطرہ بھی موجود ہے۔
انہوں نے مزید کہا کہ پیوٹن اپنی موت سے خوفزدہ ہیں اور یہی وجہ ہے کہ وہ ہر ممکن طریقے سے اقتدار سے چمٹے رہنے کی کوشش کر رہے ہیں۔
