عدالت نے چودھری مونس الہٰی کی دوبارہ گرفتاری کے لئے اقدامات کرنے کا حکم دے دیا۔
لاہور، ایف آئی اے منی لانڈرنگ کے مقدمے میں سپیشل سینٹرل عدالت کی جانب سے سابق وفاقی وزیر چودھری مونس الہٰی کی دوبارہ گرفتاری کے لئے اقدامات کرنے کا حکم دے دیا گیا۔
لاہور کی سپیشل سینٹرل عدالت کے جج تنویر احمد شیخ کی جانب سے گزشتہ سماعت کا تحریری حکم نامہ جاری کر دیا گیا۔
تحریری حکم نامے کے مطابق پی ٹی آئی رہنما چودھری مونس الہٰی اور شریک ملزم محمد جبران کو بیرون ملک سے گرفتار کرنے کے لئے دوبارہ اقدامات کئے جائیں، آئندہ سماعت پر گرفتاری کے حوالے سے اقدامات کی رپورٹ پیش کی جائے۔
عدالتی حکم کے مطابق سربراہ جے آئی ٹی عمرے پر ہونے کی وجہ سے عدالت پیش نہیں ہوئے، پرویز الہٰی نے بریت کی درخواست دائر کی، پرویز الہٰی کی بریت کی درخواست پر نوٹس جاری کرتے فریقین سے دلائل طلب کر لئے ہیں۔
سپیشل سینٹرل عدالت نے تحریری حکم میں مزید کہا کہ عدالت کیس کی مزید سماعت 20 جنوری کو کرے گی۔
