راولپنڈی: پاکستان تحریک انصاف (پی ٹی آئی) کے رہنما سلمان اکرم راجہ نے کہا ہے کہ پارٹی کے اندر پیدا ہونے والی بے چینی اور انتشار کی بنیادی وجہ بانی پی ٹی آئی سے ملاقات نہ ہونا اور ان کی رہنمائی سے محرومی ہے۔
اڈیالا روڈ پر میڈیا سے گفتگو کرتے ہوئے سلمان اکرم راجہ نے کہا کہ پی ٹی آئی کی قیادت چاہتی ہے کہ بانی سے ملاقات ہو تاکہ آئندہ کے لائحہ عمل سے متعلق ان کی واضح ہدایات حاصل کی جا سکیں۔ ان کے بقول مسلسل ملاقات نہ ہونے کی وجہ سے پارٹی قیادت شدید دباؤ کا شکار ہے۔
انہوں نے بانی پی ٹی آئی کے اہل خانہ سے متعلق سوال پر کہا کہ وہ فیملی کے مؤقف پر تبصرہ نہیں کرنا چاہتے۔ ان کا کہنا تھا کہ اگر خاندان کے افراد مشترکہ طور پر ملاقات کرنا چاہتے ہیں یا الگ الگ، تو یہ فیصلہ مکمل طور پر ان کا ذاتی معاملہ ہے۔
عمران خان ڈیل نہیں کریں گے، سر اٹھا کر واپس آئیں گے: سلمان اکرم راجہ
سلمان اکرم راجہ نے مزید کہا کہ ایک بہن کی ملاقات پر اتفاق ہونے کے باوجود ملاقات نہ ہونے کے معاملے پر متعلقہ سوالات خاندان سے کیے جانے چاہییں۔ انہوں نے اس معاملے پر مزید تبصرے سے گریز کرتے ہوئے صرف اتنا کہا کہ پارٹی کی خواہش ہے کہ بانی سے جلد ملاقات ہو تاکہ سیاسی معاملات پر ان کی رہنمائی حاصل کی جا سکے۔
