اسلام آباد میں جرمنی کے ہیڈ آف قونصلر کا کہنا ہے کہ پاکستانی طلبہ کی تعلیمی صلاحیتوں کو جرمنی میں قدر کی نگاہ سے دیکھا جاتا ہے، جبکہ داخلوں اور ویزا کے لیے صرف سرکاری ذرائع سے معلومات حاصل کی جائیں۔
اسلام آباد میں جرمنی کے ہیڈ آف قونصلر کائے روٹزبرگر نے کہا ہے کہ گزشتہ دو برسوں کے دوران جرمنی جانے والے پاکستانی طلبہ کی تعداد میں 14 فیصد اضافہ ریکارڈ کیا گیا ہے۔ ان کے مطابق یہ اضافہ اس بات کی عکاسی کرتا ہے کہ پاکستانی طلبہ جرمنی میں اعلیٰ تعلیم اور بہتر پیشہ ورانہ مواقع میں بڑھتی ہوئی دلچسپی رکھتے ہیں۔
جیو نیوز سے خصوصی گفتگو کرتے ہوئے کائے روٹزبرگر نے پاکستانی طلبہ کی تعلیمی صلاحیتوں کو سراہتے ہوئے کہا کہ پاکستان سے جرمنی آنے والے طلبہ عموماً باصلاحیت، محنتی اور اعلیٰ تعلیمی اداروں میں داخلہ حاصل کرنے کی اہلیت رکھتے ہیں۔
پاکستانی طلبہ کی صلاحیتوں کی تعریف
جرمن ہیڈ آف قونصلر نے کہا کہ پاکستانی طلبہ نہ صرف اعلیٰ تعلیم کے حصول کے لیے سنجیدہ ہوتے ہیں بلکہ وہ اپنے مستقبل کے لیے بہتر کیریئر کے مواقع بھی تلاش کرتے ہیں۔ ان کے مطابق جرمنی کی جامعات میں پاکستانی طلبہ مختلف شعبوں، خصوصاً سائنس، انجینئرنگ، آئی ٹی اور دیگر جدید مضامین میں نمایاں کارکردگی کا مظاہرہ کر رہے ہیں۔
انہوں نے کہا کہ پاکستانی نوجوانوں میں بین الاقوامی معیار کی تعلیم حاصل کرنے کا رجحان بڑھ رہا ہے، جس کے باعث جرمنی بھی ان کی ترجیحی تعلیمی منزل بنتا جا رہا ہے۔
جرمن زبان سیکھنے پر زور
کائے روٹزبرگر کے مطابق پاکستانی طلبہ جرمن زبان سیکھنے میں بھی خاص دلچسپی لے رہے ہیں اور بڑی تعداد میں طلبہ زبان میں مہارت حاصل کر رہے ہیں، جو نہ صرف تعلیم بلکہ جرمنی میں روزگار اور روزمرہ زندگی کے لیے بھی انتہائی اہم سمجھی جاتی ہے۔
کینیڈا میں تعلیم کا شاندار موقع ،پاکستانی طلبہ کیلئے سنہری دروازے کھل گئے
ان کا کہنا تھا کہ جرمن زبان پر عبور طلبہ کے لیے تعلیمی اور پیشہ ورانہ مواقع کو مزید بہتر بنا سکتا ہے۔
داخلوں کے لیے ایجنٹس پر انحصار نہ کریں
جرمنی کے ہیڈ آف قونصلر نے طلبہ کو مشورہ دیا کہ وہ جامعات میں داخلے کے لیے غیر مصدقہ ایجنٹس یا کنسلٹنٹس پر انحصار کرنے کے بجائے متعلقہ یونیورسٹیوں اور جرمن سفارت خانے کی فراہم کردہ معلومات سے رہنمائی حاصل کریں۔
انہوں نے واضح کیا کہ جرمنی کی بیشتر بڑی اور معروف یونیورسٹیاں ایجنٹس کے ذریعے داخلے نہیں دیتیں، اس لیے طلبہ کو داخلہ اور ویزا سے متعلق تمام مراحل خود یا سرکاری ذرائع سے مکمل کرنے چاہییں۔
ویزا سے متعلق معلومات سرکاری ویب سائٹ پر موجود ہیں
کائے روٹزبرگر نے بتایا کہ طلبہ ویزا، مطلوبہ دستاویزات، درخواست کے طریقہ کار اور دیگر تمام شرائط سے متعلق تازہ ترین معلومات جرمنی کے سفارت خانے کی سرکاری ویب سائٹ پر دستیاب ہیں۔ انہوں نے طلبہ کو ہدایت کی کہ وہ درست اور مستند معلومات کے لیے صرف سرکاری ذرائع سے رجوع کریں تاکہ کسی بھی قسم کی غلط فہمی یا دھوکہ دہی سے بچا جا سکے۔
جرمنی اعلیٰ تعلیم، تحقیق اور جدید ٹیکنالوجی کے شعبوں میں دنیا کے نمایاں ممالک میں شمار ہوتا ہے، جہاں ہر سال مختلف ممالک سے ہزاروں بین الاقوامی طلبہ تعلیم حاصل کرنے کے لیے جاتے ہیں۔ پاکستانی طلبہ کی تعداد میں حالیہ اضافہ دونوں ممالک کے درمیان تعلیمی تعاون میں بڑھتی ہوئی دلچسپی کی بھی عکاسی کرتا ہے۔
