ملتان ایئرپورٹ پر ایف آئی اے کی کارروائی، خاتون کو سعودی عرب بھیجنے کی کوشش ناکام

ملتان: وفاقی تحقیقاتی ادارے (ایف آئی اے) نے ملتان ایئرپورٹ پر کارروائی کرتے ہوئے عمرہ ویزے کی آڑ میں ایک خاتون کو مبینہ جنسی استحصال کے لیے سعودی عرب بھیجنے کی کوشش ناکام بنانے کا دعویٰ کیا ہے۔

ایف آئی اے ترجمان کے مطابق امیگریشن حکام نے ملتان ایئرپورٹ پر کارروائی کے دوران خاتون مسافر انیشہ بی بی کی نشاندہی پر امجد نامی ایجنٹ کو گرفتار کرلیا۔

عمرہ ویزے پر سعودی عرب روانگی کی کوشش

ترجمان کے مطابق خاتون مسافر فلائٹ نمبر ایس وی 801 کے ذریعے عمرہ ویزے پر سعودی عرب روانہ ہو رہی تھی۔ امیگریشن کلیئرنس کے دوران خاتون کو مزید جانچ پڑتال کے لیے شفٹ انچارج کے حوالے کیا گیا۔

ابتدائی تفتیش کے دوران ایف آئی اے حکام کو ایسے شواہد ملنے کا دعویٰ کیا گیا جن سے مبینہ طور پر ظاہر ہوتا ہے کہ خاتون کو جنسی استحصال کے مقصد سے بیرون ملک بھیجنے کی کوشش کی جا رہی تھی۔

ایف آئی اے ترجمان کے مطابق خاتون کے موبائل فون، چیٹس اور دیگر ڈیجیٹل مواد کی جانچ کے دوران بھی مبینہ جنسی استحصال سے متعلق شواہد سامنے آئے۔

سعودی عرب سے نیٹ ورک چلانے کا دعویٰ

ترجمان کے مطابق دورانِ تفتیش مبینہ جنسی استحصال کے نیٹ ورک سے متعلق مزید تفصیلات حاصل ہوئیں۔ ایف آئی اے کا کہنا ہے کہ خواتین کے جنسی استحصال میں مبینہ طور پر ملوث گینگ کا سرغنہ سعودی عرب سے نیٹ ورک چلا رہا تھا۔

ایف آئی اے کے مطابق گرفتار ایجنٹ نے عمرہ ویزے کی آڑ میں خاتون مسافر کے سعودی عرب جانے کے انتظامات کیے تھے۔

تین سال میں 74 ہزار سے زائد مسافر بیرونِ ملک روانگی سے روک دیے گئے، ایف آئی اے دستاویز

حکام نے خاتون کے موبائل فون اور دیگر متعلقہ ڈیجیٹل مواد کو مزید تحقیقات کے لیے تحویل میں لے لیا ہے تاکہ مبینہ نیٹ ورک اور اس میں شامل دیگر افراد کے کردار کا تعین کیا جاسکے۔

خاتون اور ایجنٹ اینٹی ہیومن ٹریفکنگ سرکل کے حوالے

ایف آئی اے ترجمان کے مطابق خاتون مسافر اور گرفتار ایجنٹ دونوں کو مزید قانونی کارروائی اور تفتیش کے لیے ایف آئی اے اینٹی ہیومن ٹریفکنگ سرکل ملتان کے حوالے کردیا گیا ہے۔

ادارے کا کہنا ہے کہ تحقیقات کے دوران سامنے آنے والی معلومات کی روشنی میں مبینہ نیٹ ورک میں شامل دیگر افراد کی نشاندہی کی جائے گی اور تمام ملوث عناصر کے خلاف قانون کے مطابق کارروائی عمل میں لائی جائے گی۔

ایف آئی اے کے مطابق معاملے کی مزید تفتیش جاری ہے، جس میں ڈیجیٹل شواہد، رابطوں اور بیرون ملک موجود مبینہ نیٹ ورک کے کردار کا جائزہ لیا جا رہا ہے۔