وزیراعلیٰ خیبرپختونخوا علی امین گنڈا پور کی جانب سے سوات دھماکے کی مذمت کرتے ہوئے پولیس کے اعلیٰ حکام سے واقعے کی رپورٹ طلب کرلی گئی ہے۔
وزیراعلیٰ خیبرپختونخوا کا کہنا ہے کہ دہشتگرد حملے میں شہید اہلکار کے اہل خانہ کی بھرپور مالی معاونت کی جائے گی، اور اس صورتحال میں انہیں تنہا نہیں چھوڑا جائے گا۔
وزیراعلیٰ کا یہ کہنا تھا کہ عوام کے جان و مال کے تحفظ کیلئے پولیس نے بے مثال قربانیاں دی ہیں۔
واضح رہے کہ گزشتہ روز سوات میں مالم جبہ روڈ پر پولیس موبائل کو ریموٹ کنٹرول بم دھماکے میں نشانہ بنایا گیا، بم دھماکے میں 1 پولیس اہلکار شہید جبکہ 3 شدید زخمی ہوگئے تھے۔
پولیس کا کہنا ہے کہ پولیس وین 10 سے زائد ممالک کے سفیروں کی سکیورٹی قافلے میں شامل تھی، خوش قسمتی سے دھماکے میں تمام سفیر محفوظ رہے۔
پولیس کے مطابق قافلے میں روس، ایران، پرتگال، انڈونیشیا، تاجکستان، قازقستان اور ایتھوپیا کے سفیر موجود تھے، واقعے کے بعد تمام سفیر اسلام آباد روانہ ہوگئے۔
پولیس کا کہنا ہے کہ تمام سفیر چیمبر کامرس مینگورہ کی تقریب میں شرکت کے بعد مالم جبہ جا رہے تھے۔
