اسلام آباد، وزیر اعظم شہباز شریف کی جانب سے دہشتگردوں سے کسی بھی قسم کی بات چیت کے امکان کو مسترد کردیا گیا ہے۔
وفاقی کابینہ کے اجلاس میں گفتگو کرتے ہوئے وزیراعظم پاکستان نے کہا کہ دہشتگردوں کے ساتھ کسی قسم کی کوئی بات چیت نہیں ہوگی اور نہ ہی بلوچستان میں نفرت پھیلانے والوں کو کوئی جگہ ملے گی۔
وزیراعظم پاکستان کا یہ کہنا تھا کہ پاک فوج کے جوان دن رات ملک دشمنوں کا پیچھا کررہے ہیں، بلوچستان میں ترقی کا پہیہ کسی صورت میں رکنے نہیں دیں گے۔
وزیراعظم پاکستان نے دورہ کوئٹہ سے متعلق بات کرتے ہوئے یہ کہا کہ کل کوئٹہ کے دورے میں امن و امان کی صورتحال کا جائزہ لیا اور شہداء کے لواحقین سے بھی ملاقاتیں کیں۔
میاں شہباز شریف کا کہنا تھا کہ کور کمانڈر کوئٹہ نے صوبے کی صورتحال پر تفصیلی بریفنگ دی ہے، بلوچستان میں سرفراز بگٹی کی حکومت کی کاوشیں تعریف کے قابل ہیں، وزیر اعلیٰ بلوچستان نے عوامی فلاح و بہبود کیلئے متعدد منصوبے شروع کیے ہوئے ہیں۔
وزیراعظم پاکستان نے اراکین کو آگاہ کیا کہ کوئٹہ اجلاس میں لیویز کی سہولیات کے حوالے سے تفصیلی گفتگو ہوئی جب کہ سیاسی عمائدین کے ساتھ بھی تمام مسائل پر بات چیت ہوئی۔
