اسلام آباد، وفاقی وزیر اطلاعات عطا تارڑ کا کہنا تھا کہ پی ٹی آئی ارکان کے اغوا کے حوالے سے جھوٹی خبریں پھیلائی گئیں۔
وفاقی وزیر اطلاعات عطا تارڑ کی جانب سے قومی اسمبلی اجلاس میں اظہار خیال کرتے ہوئے یہ کہا کہ 26ویں آئینی ترمیم اس ایوان نے منظور کی اور اس آئینی ترمیم کے تمام قانونی عوامل پورے کیے گئے۔
عطا تارڑ کا کہنا تھا کہ 26ویں آئینی ترمیم پر اتفاق رائے کے لیے بھرپور کوششیں کی گئیں جبکہ پاکستان تحریک انصاف نے تسلیم کیا تھا کہ 90 فیصد اعتراضات دور ہو گئے جبکہ ارکان کے اغوا کے حوالے سے جھوٹا پراپیگنڈا کیا گیا۔
وفاقی وزیر کا کہنا تھا کہ سربراہ مولانا فضل الرحمان کا مطالبہ تھا کہ ترمیم کو ایس سی او کے بعد ایوان میں لایا جائے، ترامیم پر آزاد ارکان کی جانب سے ضمیر کے کہنے پر ووٹ دیا گیا جبکہ پی ٹی آئی انتشار کا شکار ہےان کا ایک گروپ باہر اور دوسرا اندر ہوتا ہے۔
عطاتارڑ کا کہنا تھا کہ تحریک انصاف کے اراکین کے کہنے پر 2 شقیں نکالی گئیں اور پی ٹی آئی والوں نے آئینی ترمیم کے مسودے پر مذاکرات کیے،تحریک انصاف والے اپنی اندرونی دھڑا بندی کو پارلیمنٹ کے کھاتے میں نہ ڈالیں۔
وفاقی وزیر اطلاعات نے کہا کہ پی ٹی آئی کو چاہیے یہ اپنی جماعت کے حوالے سے معاملات کو درست کریں، پی ٹی آئی والوں نے ارکان کے اغوا ہونے سے متعلق جھوٹی خبریں پھیلائیں۔
