اسلام آباد، وزیر اعظم محمد شہباز شریف کا کہنا ہے کہ مستونگ میں سکول پر دھماکا تعلیم دشمنی کا ثبوت ہے، دہشتگرد ایسے حملوں سے قوم کے حوصلے کبھی پست نہیں کر سکتے۔
بلوچستان کے ضلع مستونگ میں گرلز ہائی اسکول پر بم دھماکے کی شدید الفاظ میں مذمت کرتے ہوئے وزیراعظم پاکستان کی جانب سے دھماکے میں بچوں اور پولیس اہلکار کی شہادت پر گہرے دکھ اور رنج کا اظہار کیا گیا۔
وزیراعظم پاکستان شہباز شریف نے شہیدوں کی بلندی درجات اور اہل خانہ کیلئے صبر کی دعا کی۔
شہباز شریف کی جانب سے ذمہ داران کی نشاندہی کر کے انہیں قرار واقعی سزا دلوانے کی ہدایت کی گئی اور زخمیوں کو بہترین طبی سہولیات فراہم کرنے کا حکم دیا ہے۔
وزیراعظم پاکستان کا کہنا تھا کہ دہشتگردوں کا اسکول پر دھماکا بلوچستان میں انکی تعلیم دشمنی کا منہ بولتا ثبوت ہے، دہشتگرد ایسے بزدلانہ حملوں سے ہماری قوم کے حوصلے پست نہیں ہوسکتے، ایسے حملے بلوچستان حکومت میں تعلیم اور ترقی کے فروغ کے عزم کو متزلزل نہیں کر سکتے۔
وزیراعظم کا کہنا تھا کہ دہشتگردی کی لعنت کے مکمل خاتمے تک اس کے خلاف جنگ جاری رکھیں گے، ملک و قوم کی خاطر قربانیاں دینے والے پولیس افسران اور جوانوں پر پوری قوم کو فخر ہے۔
