سائٹ سپر ہائی وے کے فقیرا گوٹھ میں 4 مسلح ملزمان گھر میں داخل ہوئے، اہلخانہ کے شور مچانے پر فائرنگ کرکے فرار ہوگئے
کراچی کے علاقے سائٹ سپر ہائی وے فقیرا گوٹھ میں گھر پر ڈکیتی کی کوشش کے دوران مزاحمت پر مسلح ملزمان کی فائرنگ سے ایک شخص جاں بحق جبکہ اس کا بھائی زخمی ہوگیا۔ پولیس نے واقعے کو ابتدائی طور پر ڈکیتی مزاحمت کا نتیجہ قرار دیتے ہوئے تحقیقات شروع کردی ہیں۔
4 مسلح ملزمان گھر میں داخل ہوئے
پولیس کے مطابق فقیرا گوٹھ میں چاند بنگلے کے قریب ایک گھر میں 4 مسلح ملزمان ڈکیتی کی نیت سے داخل ہوئے۔ اہلخانہ کو جب ملزمان کی موجودگی کا علم ہوا تو انہوں نے شور مچا دیا، جس پر ڈاکوؤں نے فائرنگ کردی۔
فائرنگ کے بعد ملزمان موقع سے فرار ہونے میں کامیاب ہوگئے۔ واقعے میں 2 بھائی گولیاں لگنے سے متاثر ہوئے۔ ان میں سے ایک بھائی موقع پر ہی جاں بحق ہوگیا جبکہ دوسرا زخمی ہوگیا، جسے طبی امداد کے لیے اسپتال منتقل کیا گیا۔
پولیس کو جائے وقوعہ سے پستول کے خول مل گئے
پولیس کا کہنا ہے کہ جاں بحق اور زخمی ہونے والے دونوں آپس میں بھائی ہیں۔ ابتدائی شواہد کی بنیاد پر واقعہ ڈکیتی کے دوران مزاحمت کا معلوم ہوتا ہے، تاہم مختلف پہلوؤں سے تحقیقات جاری ہیں۔
پولیس کے مطابق جائے وقوعہ سے 30 بور پستول کے 2 خول بھی برآمد ہوئے ہیں۔ تفتیشی ٹیم نے شواہد اکٹھے کرکے واقعے کی مزید تحقیقات شروع کردی ہیں تاکہ ملزمان کی شناخت اور گرفتاری میں مدد مل سکے۔
کراچی: سکیورٹی گارڈ نے شہری سے ڈکیتی کی کوشش ناکام بنا دی
مقتول 3 بچوں کا باپ تھا
جاں بحق شخص کے بھائی عدنان نے میڈیا سے گفتگو کرتے ہوئے بتایا کہ وہ اپنے بھائیوں کے ساتھ مل کر فروٹ کا کاروبار کرتے ہیں۔
انہوں نے بتایا کہ فائرنگ کے نتیجے میں جاں بحق ہونے والا ان کا بھائی عامر 3 بچوں کا باپ تھا۔ اہلخانہ کا آبائی تعلق رحیم یار خان سے ہے اور وہ روزگار کے سلسلے میں کراچی میں مقیم تھے۔
واقعے کے بعد علاقے میں خوف و تشویش کی فضا پیدا ہوگئی، جبکہ اہلخانہ غم سے نڈھال ہیں۔
لاش ورثا کے حوالے
پولیس کے مطابق واقعے کے بعد ضابطے کی کارروائی مکمل کی گئی، جس کے بعد جاں بحق شخص کی لاش ورثا کے حوالے کردی گئی۔
پولیس کا کہنا ہے کہ واقعے کی مزید تحقیقات جاری ہیں اور ملزمان کی گرفتاری کے لیے شواہد کی مدد سے کارروائی کی جارہی ہے۔ تفتیش مکمل ہونے کے بعد واقعے سے متعلق مزید حقائق سامنے آنے کی توقع ہے۔
