اسرائیلی بربریت تاحال جاری، غزہ اور لبنان پر بمباری سے مزید درجنوں شہری شہید اور سینکڑوں شدید زخمی ہو گئے۔
جنگی طیاروں کی جانب سے لبنانی دارالحکومت بیروت میں قائم ایک عمارت کو نشانہ بنایا گیا جس کے نتیجے میں 6 افراد شہید ہو گئے، 24 گھنٹوں کے دوران لبنان میں شہادتوں کی تعداد 40 ہو گئی۔
غیر ملکی رپورٹ کے مطابق اسرائیلی طیاروں نے جس عمارت کو نشانہ بنایا وہ لبنانی پارلیمنٹ، وزیراعظم کی رہائش گاہ اور اقوام متحدہ کے ہیڈ کوارٹر سے زیادہ دور نہیں، اسرائیلی حملے کے بعد عمارتوں میں آگ بھڑک اٹھی۔
اسکے علاوہ اسرائیلی فورسز کی جانب سے غزہ میں بھی کئی عمارتوں کو نشانہ بنایا گیا جس کے نتیجے میں 70 فلسطینی شہید ہو گئے۔
غیر ملکی میڈیا کے مطابق حزب اللہ کے تل ابیب میں ڈرون حملوں سے شہری خوفزدہ ہو کر بھاگ گئے، بھگڈر مچنے سے کچھ افراد زخمی ہوگئے۔
دوسری جانب اسرائیل کی جانب سے حزب اللہ سے لڑائی میں 8 فوجیوں کی ہلاکت کی تصدیق کرتے ہوئے یہ کہا گیا ہے کہ جنوبی لبنان میں زمینی کارروائیوں کے دوران حزب اللہ سے جھڑپوں میں 8 فوجی ہلاک جبکہ 20 سے زائد زخمی ہوئے ہیں۔
