امریکی صدر ڈونلڈ ٹرمپ نے وائٹ ہاؤس میں میڈیا سے گفتگو کے دوران سی این این کی خاتون صحافی کے سوالات پر سخت ردعمل کا اظہار کرتے ہوئے انہیں تنقید کا نشانہ بنا دیا۔
رپورٹس کے مطابق صحافی نے جنوبی کوریا سے متعلق صدر ٹرمپ سے سوالات کرنے کی کوشش کی، تاہم ابتدا میں امریکی صدر نے سوال کو نظرانداز کیا اور بعد ازاں صحافی کے انداز پر برہمی کا اظہار کیا۔
ٹرمپ نے صحافی کو مخاطب کرتے ہوئے الزام عائد کیا کہ وہ شور مچانے والی جعلی رپورٹر ہیں اور جھوٹی خبریں دیتی ہیں۔ امریکی صدر نے ان کے سوالات کا جواب دینے کے بجائے انہیں بے ادب قرار دے کر نظرانداز کردیا۔
اس دوران ٹرمپ نے امریکی بحری بیڑے یو ایس ایس ابراہم لنکن پر کھانے کی مبینہ کمی سے متعلق سی این این کی رپورٹ کا بھی حوالہ دیا اور اسے غلط خبر قرار دیا۔
5 جنگی طیارے مار گرائے گئےمگربھارت کی ہٹ دھرمی برقرار،سی این این نے بھی کھری کھری سناد ی
امریکی صدر کا کہنا تھا کہ بحری جہاز پر صورتحال معمول کے مطابق ہے اور وہاں کسی قسم کی خوراک کی قلت نہیں۔
ٹرمپ اور سی این این کے درمیان اختلافات پہلے بھی متعدد مواقع پر سامنے آتے رہے ہیں، جبکہ امریکی صدر ماضی میں بھی نیوز چینل کی رپورٹنگ کو تنقید کا نشانہ بناتے رہے ہیں۔
