آزاد کشمیر: استحکام پاکستان پارٹی (آئی پی پی) کے رہنما اور رکن پنجاب اسمبلی شعیب صدیقی نے کہا ہے کہ سردار تنویر الیاس آئندہ عام انتخابات کے بعد بھی آزاد کشمیر کے وزیراعظم ہوں گے، جبکہ پارٹی خطے میں حکومت بنانے کے لیے بھرپور تیاری کر رہی ہے۔
ایک تقریب سے خطاب کرتے ہوئے شعیب صدیقی نے استحکام پاکستان پارٹی میں شامل ہونے والے نئے کارکنوں اور رہنماؤں کو مبارکباد دیتے ہوئے کہا کہ پارٹی تیزی سے عوامی حمایت حاصل کر رہی ہے اور آئندہ انتخابات میں مضبوط سیاسی قوت بن کر سامنے آئے گی۔
انہوں نے کہا کہ آئی پی پی کے صدر عبدالعلیم خان آزاد کشمیر کو ترقی یافتہ اور خوشحال خطہ بنانے کا وژن رکھتے ہیں۔ ان کے مطابق گلگت بلتستان کے انتخابات میں پارٹی تیسری بڑی سیاسی جماعت کے طور پر ابھری، اور اب اسی طرز پر آزاد کشمیر میں بھی حکومت بنانے کا ہدف مقرر کیا گیا ہے۔
سابق وزیراعظم آزادکشمیر سردار تنویر الیاس پیپلز پارٹی میں شامل
شعیب صدیقی کا کہنا تھا کہ استحکام پاکستان پارٹی آزاد کشمیر کی 30 سے زائد نشستوں پر اپنے امیدوار میدان میں اتارے گی اور عوامی اعتماد کے ذریعے کامیابی حاصل کرنے کی کوشش کرے گی۔
