جرمنی سے تعلق رکھنے والے نوجوان اینڈرے اورٹولف نے حیران کن کارنامہ انجام دیتے ہوئے صرف ایک منٹ میں سوا کلو سے زائد شہد کھا کر نیا عالمی ریکارڈ اپنے نام کر لیا۔ ان کی اس غیر معمولی کامیابی کو گنیز ورلڈ ریکارڈز میں بھی شامل کر لیا گیا ہے۔
شہد دنیا بھر میں پسند کی جانے والی قدرتی غذا ہے، تاہم اس کی گاڑھی ساخت کے باعث اسے بڑی مقدار میں تیزی سے کھانا انتہائی مشکل سمجھا جاتا ہے۔ یہی وجہ ہے کہ اینڈرے اورٹولف کا یہ کارنامہ لوگوں کی توجہ کا مرکز بن گیا ہے۔
رپورٹس کے مطابق اینڈرے نے محض 60 سیکنڈز میں 1,273 گرام، یعنی تقریباً سوا کلو شہد کھا کر نیا ریکارڈ قائم کیا۔ سوشل میڈیا پر گردش کرنے والی ویڈیو میں انہیں ایک بڑے چمچ کے ذریعے غیر معمولی رفتار سے شہد کھاتے دیکھا جا سکتا ہے۔
ماہرین کے مطابق اتنی بڑی مقدار میں شہد کو مختصر وقت میں نگلنا عام افراد کے لیے مشکل اور بعض اوقات خطرناک بھی ثابت ہو سکتا ہے، تاہم اینڈرے نے اپنی مشق، مہارت اور تجربے کی بدولت یہ منفرد چیلنج کامیابی سے مکمل کیا۔
اینڈرے اورٹولف اس سے قبل بھی کئی غیر معمولی اور منفرد عالمی ریکارڈز قائم کر چکے ہیں اور انہیں عجیب و غریب چیلنجز میں مہارت رکھنے والے ریکارڈ ہولڈر کے طور پر جانا جاتا ہے۔
