رکن قومی اسمبلی شیر افضل مروت نے کہا ہے کہ پاکستان تحریک انصاف (پی ٹی آئی) کے بانی عمران خان تک صرف ان کی بہنوں کی رسائی ہے، اور یہی وجہ ہے کہ وہ جیل سے باہر نہیں آ سکے۔
ڈی آئی خان میں میڈیا سے گفتگو کرتے ہوئے شیر افضل مروت نے کہا کہ پارٹی کی موجودہ قیادت نہ خود کام کرتی ہے اور نہ دوسروں کو کرنے دیتی ہے۔ انہوں نے مزید کہا کہ علی امین گنڈاپور کو پارٹی میں واپس لانے کے لیے قیادت کو انہیں راضی کرنا ہوگا، اور علی امین کو ہٹانے کے لیے پارٹی نے پہلے الزام تراشیاں کی تھیں۔
انہوں نے موجودہ وزیراعلیٰ خیبر پختونخوا پر بھی تنقید کرتے ہوئے کہا کہ "ایسے بندے کو اب وزیراعلیٰ بنایا گیا ہے جو پرائمری اسکول نہیں چلاسکتا اور چھ ماہ میں اپنی کابینہ بھی نہیں بنا سکا۔”
شیر افضل مروت نے مزید کہا کہ موجودہ وزیراعلیٰ اسٹیبلشمنٹ سے رابطوں میں علی امین گنڈاپور سے بھی آگے ہیں، اور پارٹی علی امین اور بیرسٹر گوہر کو آگے لائے بغیر آگے نہیں بڑھے گی۔
