پاکستان شوبز انڈسٹری کی معروف شخصیات فریال گوہر اور جمال شاہ نے طلاق کے تقریباً 30 برس بعد پہلی مرتبہ اپنی ازدواجی زندگی کے خاتمے سے متعلق کھل کر گفتگو کی ہے۔
دونوں فنکار حال ہی میں ایک نجی ٹی وی چینل کی رمضان نشریات میں شریک ہوئے جہاں انہوں نے نہایت سنجیدہ اور باوقار انداز میں ماضی کے معاملات پر روشنی ڈالی۔
ماضی میں اس جوڑی کو شوبز کی مثالی اور باوقار جوڑی سمجھا جاتا تھا، تاہم 1992 میں دونوں نے علیحدگی اختیار کر لی تھی جبکہ فریال گوہر چند برس بعد 1995 میں بیرونِ ملک منتقل ہو گئی تھیں۔ پروگرام کے دوران انہوں نے واضح کیا کہ ان کے درمیان اختلافات کا آغاز 1987 سے ہو چکا تھا جو وقت کے ساتھ بڑھتے گئے۔
فریال گوہر کا کہنا تھا کہ شادی کے رشتے میں باہمی احترام اور رضامندی بنیادی حیثیت رکھتے ہیں۔ ان کے مطابق جمال شاہ اپنی ذاتی آزادی کو بے حد اہم سمجھتے تھے اور خود کو ازدواجی ذمہ داریوں میں محدود محسوس کرتے تھے۔ انہوں نے کہا کہ وہ کبھی یہ نہیں سمجھتیں کہ میاں بیوی ایک دوسرے کی ملکیت ہوتے ہیں، اسی لیے جب کسی ایک کا دل رشتے میں نہ رہے تو زبردستی نبھانا مناسب نہیں ہوتا۔ انہوں نے جمال شاہ کے فیصلے کو سمجھتے ہوئے باوقار انداز میں علیحدگی قبول کی۔
دوسری جانب جمال شاہ نے بھی اعتراف کیا کہ وہ خود کو شادی کے لیے موزوں شخصیت نہیں سمجھتے تھے اور ان کی طبیعت میں آزادی پسندی نمایاں تھی۔ انہوں نے بتایا کہ اسلام آباد میں ایک خاتون کے ساتھ آرٹ انسٹیٹیوٹ قائم کرنے کی کوشش ان کے تعلق میں آخری موڑ ثابت ہوئی۔ فریال گوہر سمیت دیگر قریبی افراد نے انہیں اس شراکت سے گریز کا مشورہ دیا تھا، مگر انہوں نے اپنی رائے پر عمل کیا۔ بعد ازاں منصوبہ ناکام رہا اور اسی دوران دونوں کے اختلافات شدت اختیار کر گئے۔
دونوں فنکاروں نے اس بات پر زور دیا کہ علیحدگی کے باوجود ان کے درمیان احترام کا رشتہ برقرار رہا۔ ان کا کہنا تھا کہ انہوں نے کبھی دانستہ طور پر ایک دوسرے سے تعلق ختم نہیں کیا اور آج بھی ایک دوسرے کے لیے عزت اور نیک جذبات رکھتے ہیں۔
