کراچی: معروف اداکارہ غنا علی کا کہنا ہے کہ موجودہ دور میں مخلص اور شریف مرد کم ہی دکھائی دیتے ہیں، اس لیے اگر کسی لڑکی کو اچھا اور سنجیدہ جیون ساتھی مل جائے تو اسے بلا تاخیر شادی کا فیصلہ کر لینا چاہیے۔
حال ہی میں ایک نجی ٹی وی کے مزاحیہ پروگرام میں گفتگو کرتے ہوئے اداکارہ نے اپنی ازدواجی زندگی اور پہلی ملاقات سے متعلق دلچسپ واقعات شیئر کیے۔ ان کا کہنا تھا کہ زندگی میں سکون اور خلوص بہت قیمتی چیزیں ہیں، اور اگر کوئی مرد دیانتدار اور خیال رکھنے والا ہو تو اس موقع کو ضائع نہیں کرنا چاہیے۔
غنا علی نے بتایا کہ ان کی اپنے شوہر سے پہلی ملاقات ایک شوٹنگ رینج پر ہوئی جہاں وہ پستول چلانے کی پریکٹس کر رہی تھیں۔ انہوں نے ہنستے ہوئے کہا کہ وہ غلط انداز میں فائرنگ کر رہی تھیں، اسی دوران ان کے شوہر نے انہیں درست طریقہ سمجھایا۔ اسی موقع سے دونوں کے درمیان گفتگو کا آغاز ہوا جو بعد میں دوستی اور پھر رشتے میں بدل گئی۔
اداکارہ نے مزاحیہ انداز میں کہا کہ وہ تو ویسے ہی گولیاں چلا رہی تھیں مگر ان کے شوہر آنکھوں سے گولیاں چلا رہے تھے، جس پر پروگرام میں خوب قہقہے لگے۔ ان کے مطابق ان کے شوہر طبیعتاً شرمیلے ہیں، تاہم انہوں نے نمبر کے تبادلے کی درخواست کی جس پر اداکارہ نے مثبت جواب دیا۔ بعد ازاں دونوں کے درمیان رابطہ بڑھتا گیا اور چند ماہ کی رفاقت کے بعد باقاعدہ شادی کی پیشکش کر دی گئی۔
عمر کو چھوڑیں، دل جوان ہونا چاہیے: حکیم بابر کا ناقدین کو جواب
غنا علی کا کہنا تھا کہ شادی کے بعد ان کی زندگی میں خوشیوں اور اطمینان میں اضافہ ہوا ہے۔ انہوں نے بتایا کہ ماضی میں وہ زیادہ تر تنہا وقت گزارتی تھیں کیونکہ گھر کے دیگر افراد اپنی مصروفیات میں مشغول رہتے تھے، لیکن اب شوہر کی موجودگی انہیں بھرپور ساتھ اور سکون فراہم کرتی ہے۔
اداکارہ کے اس بیان پر سوشل میڈیا پر مختلف تبصرے دیکھنے میں آ رہے ہیں، جہاں مداح ان کی صاف گوئی اور خوشگوار ازدواجی زندگی کے اعتراف کو سراہ رہے ہیں۔
