سوشل میڈیا پر کمسن کرکٹر آئینہ وزیر کی بولنگ ویڈیو وائرل ہونے کے بعد ایک افسوسناک واقعہ پیش آیا، جس میں ویڈیو بنانے والے نوجوان کو مبینہ طور پر اغوا کر لیا گیا۔ واقعے نے علاقے میں تشویش کی فضا پیدا کر دی تھی، تاہم مقامی جرگے کی کوششوں سے نوجوان بحفاظت بازیاب ہو گیا۔
چند روز قبل آٹھ سالہ آئینہ وزیر کی کرکٹ کھیلتے ہوئے ویڈیو سوشل میڈیا پر تیزی سے مقبول ہوئی۔ ویڈیو میں بچی کو شاندار انداز میں بولنگ کرتے دیکھا گیا، جس پر صارفین کی جانب سے خوب پذیرائی ملی۔ تاہم ویڈیو بنانے اور آن لائن شیئر کرنے والے نوجوان زعفران وزیر کو نامعلوم افراد نے مبینہ طور پر شیوہ سب ڈویژن سے اغوا کر لیا۔
دورانِ حراست ایک ویڈیو بھی منظرِ عام پر آئی، جس میں زعفران وزیر نے ویڈیو شیئر کرنے کو اپنی غلطی قرار دیا اور کہا کہ وہ نامعلوم افراد کی تحویل میں ہیں۔ مبینہ اغوا کاروں کی جانب سے مؤقف اختیار کیا گیا کہ کمسن بچی کی کرکٹ کھیلتے ہوئے ویڈیو بنانا اور اسے پھیلانا مذہبی اور مقامی روایات کے خلاف ہے۔
واقعے کے بعد علاقے میں قبائلی عمائدین متحرک ہوئے اور جرگے کے ذریعے معاملے کو حل کرنے کی کوشش کی گئی۔ بالآخر جرگے کی مداخلت سے نوجوان کو بحفاظت رہا کرا لیا گیا۔ رہائی کے بعد اہلِ علاقہ نے ان کا استقبال کیا، ہار پہنائے اور خوشی کا اظہار کیا، جس کی ویڈیوز بھی سوشل میڈیا پر گردش کرتی رہیں۔
ڈسٹرکٹ پولیس آفیسر سجاد حسین نے تصدیق کی کہ نوجوان اپنے اہلِ خانہ سے بحفاظت مل چکے ہیں۔ ان کے مطابق واقعے کی مزید تحقیقات جاری ہیں تاکہ ذمہ داران کا تعین کیا جا سکے۔
یاد رہے کہ آئینہ وزیر کی کرکٹ صلاحیتوں کا چرچا ملک بھر میں ہو رہا ہے اور انہیں حال ہی میں خواتین کرکٹ کے ایک مقامی پلیٹ فارم میں بھی شامل کیے جانے کی خبریں سامنے آئی تھیں، جس سے علاقے میں کھیلوں کے فروغ کی نئی امید پیدا ہوئی ہے۔
