برطانوی شاہی خاندان سے تعلق رکھنے والے پرنس اینڈریو کو سرکاری عہدے کے ممکنہ غلط استعمال کے شبے میں گرفتار کر لیا گیا ہے۔ پولیس کے مطابق انہیں نورفوک میں واقع ان کی رہائش گاہ سے حراست میں لیا گیا، جس کے بعد معاملے کی باضابطہ تحقیقات کا آغاز کر دیا گیا ہے۔
پولیس حکام کا کہنا ہے کہ گرفتاری کے بعد برکشائر اور نورفوک کے مختلف مقامات پر تلاشی کی کارروائیاں بھی کی جا رہی ہیں۔ تھامس ویلی پولیس کے اسسٹنٹ چیف کانسٹیبل اولیور رائٹ کے مطابق ابتدائی شواہد کا جائزہ لینے کے بعد سرکاری اختیارات کے ممکنہ غلط استعمال سے متعلق الزامات پر باقاعدہ انکوائری شروع کی گئی۔ انہوں نے کہا کہ تحقیقات کو شفاف اور غیر جانبدار رکھنا اولین ترجیح ہے اور عوامی دلچسپی کے پیش نظر مناسب وقت پر مزید تفصیلات جاری کی جائیں گی۔
برطانوی میڈیا رپورٹس کے مطابق پولیس اہلکار غیر نشان زد گاڑیوں میں سینڈرنگھم اسٹیٹ کے ووڈ فارم ہاؤس پہنچے، جہاں کارروائی صبح تقریباً آٹھ بجے کی گئی۔ تصاویر میں قانون نافذ کرنے والے اداروں کے اہلکاروں کو رہائش گاہ کے اطراف موجود دیکھا گیا۔
ایپسٹین فائلز پر بھارت میں سیاسی ہلچل، کانگریس کی مودی پر شدید تنقید
پولیس ذرائع کا دعویٰ ہے کہ اینڈریو ماؤنٹ بیٹن ونڈسر پر الزام ہے کہ انہوں نے اپنے عہدے کے دوران بعض حساس معلومات امریکی سرمایہ کار اور سزا یافتہ جنسی مجرم جیفری ایپسٹین کے ساتھ شیئر کیں۔ تاہم اس حوالے سے حتمی شواہد اور فردِ جرم کی تفصیلات تاحال سامنے نہیں آئیں۔
یاد رہے کہ پرنس اینڈریو ماضی میں بھی جیفری ایپسٹین سے روابط کے باعث شدید تنقید اور قانونی دباؤ کا سامنا کر چکے ہیں، جس کے بعد وہ عوامی شاہی ذمہ داریوں سے دستبردار ہو گئے تھے۔ موجودہ گرفتاری اور تحقیقات نے ایک بار پھر برطانوی شاہی خاندان کو عوامی اور سیاسی بحث کا مرکز بنا دیا ہے۔ حکام کا کہنا ہے کہ تحقیقات مکمل ہونے کے بعد ہی الزامات کی نوعیت اور ممکنہ قانونی کارروائی کے بارے میں واضح مؤقف سامنے آ سکے گا۔
