سعودی عرب نے حج 2026 کی بروقت اور منظم تیاریوں کا آغاز کرتے ہوئے ویزا پالیسی سے متعلق اہم اعلان کر دیا ہے۔ سعودی وزارت حج و عمرہ کے مطابق آئندہ حج سیزن کے لیے عازمین کو ویزوں کا اجرا 8 فروری سے شروع کر دیا جائے گا، تاکہ دنیا بھر سے آنے والے حجاج کرام کو سفر اور انتظامات کے لیے زیادہ سہولت فراہم کی جا سکے۔
سعودی وزارت حج و عمرہ نے جدہ سے جاری اپنے بیان میں واضح کیا کہ حج سے تقریباً چار ماہ قبل ویزوں کا اجرا ایک سوچے سمجھے منصوبے کے تحت کیا جا رہا ہے۔ اس اقدام کا بنیادی مقصد یہ ہے کہ عازمین حج کو تیاری کے لیے مناسب وقت مل سکے اور رش، تاخیر یا انتظامی مشکلات سے بچا جا سکے۔ حکام کے مطابق بروقت ویزا اجرا سے رہائش، سفری انتظامات اور دیگر سہولیات کی منصوبہ بندی بہتر انداز میں ممکن ہو سکے گی۔
وزارت حج و عمرہ نے بتایا کہ حج انتظامات کے سلسلے میں اب تک 73 حج خدمات فراہم کرنے والے اداروں کے ساتھ بنیادی معاہدے طے پا چکے ہیں۔ ان معاہدوں کے ذریعے عازمین کو رہائش، نقل و حمل، کھانے اور دیگر بنیادی سہولیات فراہم کی جائیں گی۔ مزید یہ کہ بیرون ملک سے آنے والے عازمین حج کے حوالے سے تمام معاہدے سو فیصد مکمل کر لیے گئے ہیں، جو حج انتظامات میں ایک اہم پیش رفت سمجھی جا رہی ہے۔
حج 2026: سعودی ویزہ کے لیے بائیو میٹرک مکمل کرنا لازمی قرار
سعودی حکام کے مطابق اب تک 7 لاکھ 50 ہزار سے زائد عازمین حج کی رجسٹریشن مکمل ہو چکی ہے، جو اس بات کی عکاسی کرتی ہے کہ دنیا بھر میں حج 2026 کے لیے غیر معمولی دلچسپی پائی جا رہی ہے۔ اس کے علاوہ تقریباً 30 ہزار عازمین نے اپنے اپنے ممالک سے براہ راست حج پیکیجز کی بکنگ بھی مکمل کر لی ہے۔
وزارت حج و عمرہ کا کہنا ہے کہ سعودی حکومت عازمین حج کو بہترین سہولیات فراہم کرنے کے لیے جدید ٹیکنالوجی، ڈیجیٹل سسٹمز اور مربوط انتظامی ڈھانچے پر کام کر رہی ہے۔ حکام نے یقین دلایا کہ حج کے دوران سلامتی، صحت اور سہولت کو اولین ترجیح دی جائے گی تاکہ عازمین پوری یکسوئی اور اطمینان کے ساتھ اپنے مذہبی فرائض ادا کر سکیں۔
