وزیرِ اعظم شہباز شریف نے کہا ہے کہ شفافیت کو یقینی بنانے اور فوڈ سیکیورٹی کے معیار بلند کرنے کے لیے جدید ٹیکنالوجی کا استعمال ہمارا عزم ہے۔
لاہور میں تقریب سے خطاب کرتے ہوئے وزیرِ اعظم نے بتایا کہ پنجاب ایگریکلچر، فوڈ اینڈ ڈرگ اتھارٹی خطے میں "سینٹر آف ایکسیلنس” بنے گی اور یہ ادارہ خوراک، زرعی مصنوعات اور ادویات کی نگرانی کے لیے ریگولیٹری رول ادا کرے گا۔
شہباز شریف نے وزیرِ اعلیٰ پنجاب مریم نواز کی اس منصوبے میں کاوشوں کو سراہا اور کہا کہ فرانزک لیب کے قیام سے جرائم کے خلاف شواہد فراہم کرنا ممکن ہوگا۔ ان کا کہنا تھا کہ اتھارٹی فوڈ سیکیورٹی، غذائیت کی فراہمی اور ملاوٹ کے خاتمے میں کلیدی کردار ادا کرے گی۔
وزیرِ اعظم نے مزید کہا کہ سائنسدانوں اور ماہرین کی محنت لائق تحسین ہے اور یہ اتھارٹی نہ صرف پنجاب بلکہ پورے ملک کی خدمت کے لیے بنائی گئی ہے، جس سے شفاف اور مؤثر نگرانی کو یقینی بنایا جا سکے گا۔
