ملک کے مختلف حصوں میں مزید بارش اور برفباری کی پیش گوئی کی گئی ہے، جبکہ ایران کے راستے داخل ہونے والا ایک نیا مغربی موسمی سسٹم بلوچستان میں اثر انداز ہونا شروع ہو گیا ہے، جس کے نتیجے میں متعدد علاقوں میں بارش اور برفباری کا آغاز ہو چکا ہے۔
بلوچستان کے شہر چمن اور اس کے گرد و نواح میں موسلادھار بارش کے باعث نشیبی علاقے زیرِ آب آ گئے ہیں۔ اسی طرح وادی کوئٹہ اور اطراف میں ہلکی برفباری ریکارڈ کی گئی، جبکہ زیارت اور قلات میں بھی برف پڑنے کی اطلاعات ہیں، جس سے سردی کی شدت میں اضافہ ہو گیا ہے۔
محکمہ موسمیات کے مطابق یہ سلسلہ منگل تک جاری رہ سکتا ہے۔ پیش گوئی میں بتایا گیا ہے کہ بلوچستان، گلگت بلتستان، آزاد کشمیر، خیبر پختونخوا، اسلام آباد، مری اور گلیات میں بارش جبکہ پہاڑی علاقوں میں برفباری کا امکان ہے۔
خیبر پختونخوا میں بارش اور برفباری، 9 افراد جاں بحق، پی ڈی ایم اے
محکمہ موسمیات کا کہنا ہے کہ پنجاب کے مختلف علاقوں بشمول لاہور اور ملتان میں بھی وقفے وقفے سے بارش ہو سکتی ہے، جس سے موسم سرد اور خوشگوار ہونے کے ساتھ ساتھ معمولاتِ زندگی متاثر ہونے کا خدشہ بھی ہے۔
حکام نے شہریوں کو احتیاطی تدابیر اختیار کرنے اور پہاڑی علاقوں کا غیر ضروری سفر مؤخر کرنے کی ہدایت کی ہے۔
