جہلم: وزیراعلیٰ پنجاب کے ویژن کے مطابق شہر کی خوبصورتی میں اضافے اور شہریوں کو بہتر سہولیات کی فراہمی کے لیے ڈپٹی کمشنر جہلم میر رضا اوزگن نے اولڈ جی ٹی روڈ اور جہلم بازار کا تفصیلی دورہ کیا۔
اس موقع پر انہوں نے اعلان کیا کہ جہلم بازار کو جدید سہولیات سے آراستہ ایک ماڈل بازار بنایا جائے گا تاکہ شہر کی اصل خوبصورتی بحال ہو سکے اور شہریوں کو ایک معیاری تجارتی ماحول میسر آ سکے۔
ڈپٹی کمشنر جہلم نے اولڈ جی ٹی روڈ پر جاری بیوٹی فکیشن منصوبوں کا معائنہ کرتے ہوئے سڑک کے اطراف وسیع پیمانے پر شجرکاری کی ہدایت کی۔ انہوں نے متعلقہ حکام کو حکم دیا کہ شاہراہوں کو خوبصورت بنانے کے لیے جدید شجرکاری کے ساتھ ساتھ لائٹنگ کے نظام کو بھی بہتر بنایا جائے تاکہ جی ٹی روڈ سے شہر تک کا علاقہ خوشنما اور دلکش منظر پیش کرے۔
جہلم بازار کو ماڈل بازار بنانے کے سلسلے میں ڈپٹی کمشنر جہلم میر رضا اوزگن نے بازار کے مختلف حصوں کا جائزہ لیا۔ انہوں نے میونسپل کمیٹی کے افسران کو ہدایت کی کہ صفائی ستھرائی کے انتظامات کی روزانہ کی بنیاد پر نگرانی کی جائے، تجاوزات کا مکمل خاتمہ کیا جائے اور بازار کی تزئین و آرائش کے کام میں تیزی لائی جائے تاکہ اسے جلد از جلد ماڈل بازار کا درجہ دیا جا سکے۔
ڈپٹی کمشنر جہلم میر رضا اوزگن کا ڈی ایچ کیو ہسپتال کا دورہ، کیتھ لیب اور ایمرجنسی کا تفصیلی معائنہ
دورے کے اختتام پر ڈپٹی کمشنر جہلم نے کہا کہ شہر کی خوبصورتی میں اضافہ، اہم شاہراہوں کی شجرکاری اور بازاروں کی بہتری ضلعی انتظامیہ کی اولین ترجیحات میں شامل ہیں۔ انہوں نے تمام متعلقہ محکموں کو پابند کیا کہ بیوٹی فکیشن اور ماڈل بازار کے منصوبوں کو مقررہ وقت کے اندر مکمل کیا جائے تاکہ جہلم کو اس کی تاریخی اہمیت کے مطابق ایک ماڈل اور خوبصورت شہر بنایا جا سکے۔
