جہلم :وزیراعلیٰ پنجاب کے ویژن کے مطابق معیاری صحت کی سہولیات کی فراہمی کو یقینی بنانے کے لیے ڈپٹی کمشنر جہلم میر رضا اوزگن نے علی الصبح ڈسٹرکٹ ہیڈ کوارٹر (ڈی ایچ کیو) ہسپتال جہلم کا دورہ کیا۔ دورے کے دوران انہوں نے ہسپتال کے مختلف شعبوں بشمول کیتھ لیب اور ایمرجنسی وارڈ کا تفصیلی معائنہ کیا اور مریضوں کو فراہم کی جانے والی طبی سہولیات اور عملے کی کارکردگی کا جائزہ لیا۔
ڈپٹی کمشنر نے کیتھ لیب اور ایمرجنسی میں دستیاب طبی آلات، ڈاکٹروں اور پیرامیڈیکل اسٹاف کی حاضری کا ریکارڈ چیک کیا اور ہدایت کی کہ ایمرجنسی میں آنے والے مریضوں کو فوری اور بروقت طبی امداد فراہم کی جائے۔ انہوں نے واضح کیا کہ ادویات کی مفت فراہمی میں کسی قسم کی تاخیر یا کوتاہی ہرگز برداشت نہیں کی جائے گی۔
صفائی ستھرائی کے انتظامات کا جائزہ لیتے ہوئے ڈپٹی کمشنر جہلم نے وارڈز اور واش رومز کی حالت مزید بہتر بنانے کی ہدایت کی اور کہا کہ ہسپتال میں صفائی اور مریضوں کی دیکھ بھال کے معیار کو روزانہ کی بنیاد پر بہتر بنایا جائے کیونکہ صاف ستھرا ماحول معیاری علاج کی بنیاد ہے۔
ڈپٹی کمشنر جہلم میر رضا اوزگن کا ڈی ایچ کیو ہسپتال کا تفصیلی دورہ، طبی سہولیات کا جائزہ
ڈپٹی کمشنر میر رضا اوزگن نے زیر علاج مریضوں اور ان کے لواحقین سے بھی ملاقات کی اور ہسپتال عملے کے رویے اور دستیاب سہولیات کے بارے میں معلومات حاصل کیں۔ انہوں نے ہسپتال انتظامیہ کو ہدایت کی کہ تمام طبی مشینری کو مکمل فعال حالت میں رکھا جائے اور مریضوں کی شکایات کا فوری ازالہ کیا جائے تاکہ حکومتی پالیسیوں کے مطابق صحت کے شعبے میں مؤثر بہتری لائی جا سکے۔
