جہلم سمیت پنجاب میں نیو ایئر کی رات کو امن و امان برقرار رکھنے کے لیے پولیس نے ایک جامع سکیورٹی پلان تیار کر لیا ہے۔ پلان کے تحت سخت حفاظتی اقدامات اور خلاف ورزی کرنے والوں کے لیے واضح سزائیں مقرر کی گئی ہیں۔
میڈیا رپورٹس کے مطابق آئی جی پنجاب ڈاکٹر عثمان انور نے صوبہ بھر میں سکیورٹی ہائی الرٹ رکھنے اور تمام فیلڈ فارمیشنز کو مکمل چوکس رہنے کی ہدایات جاری کر دی ہیں۔
نیو ایئر نائٹ پر پورے صوبے میں 25 ہزار سے زائد پولیس افسران اور اہلکار سکیورٹی ڈیوٹی انجام دیں گے جبکہ صرف لاہور میں 5 ہزار سے زائد اہلکار تعینات کیے جائیں گے۔
تعینات کی جانے والی نفری میں 419 انسپکٹرز، 1 ہزار 267 سب انسپکٹرز، 2 ہزار 189 اسسٹنٹ سب انسپکٹرز، 1 ہزار 408 ہیڈ کانسٹیبل اور 16 ہزار 977 کانسٹیبلز شامل ہیں۔
پولیس نے شہریوں سے اپیل کی ہے کہ کسی بھی مشکوک سرگرمی، ون ویلنگ یا ہوائی فائرنگ کی اطلاع فوری طور پر ہیلپ لائن 15 پر دیں تاکہ بروقت کارروائی ممکن بنائی جا سکے۔
آئی جی پنجاب نے مزید ہدایت کی ہے کہ جہلم سمیت پورے صوبے میں سی سی ٹی وی کیمروں کے ذریعے تمام سرگرمیوں کی کڑی نگرانی کی جائے اور ملک دشمن عناصر، مشکوک افراد اور قانون شکنی میں ملوث عناصر پر خصوصی نظر رکھی جائے۔ شہریوں کی حفاظت اور نیو ایئر کی رات کو امن و امان قائم رکھنے کے لیے پولیس کی یہ جامع حکمت عملی اہم اقدام ہے۔
